Vakumit gati pesë vjeçar të mos njohjes së Kosovës i dha fund të mërkurën Kenia.
Kështu shteti më i ri në Evropë e siguroi njohjen e 118-të.
Shteti i kontinentit afrikan, vendosi ta njoh pavarësinë e Kosovës pavarësisht fushatës agresive diplomatike të Serbisë e cila loboi edhe tek shtetet afrikane që ato të mos e njohin pavarësinë e republikës 17 vjeçare.
Ministria e Jashtme e Serbisë e ka dënuar fuqishëm këtë vendim të Kenisë.
Sipas tyre ky hap përbën shkelje të rëndë të së drejtës ndërkombëtare.
“Ky hap përbën shkelje të rëndë të së drejtës ndërkombëtare dhe cenim të drejtpërdrejtë të Rezolutës 1244 të Këshillit të Sigurimit të Kombeve të Bashkuara, me të cilën garantohet në mënyrë të qartë sovraniteti dhe integriteti territorial i Republikës së Serbisë”, thuhet nga MPJD
Mirëpo nuk vonoi shumë përgjigja e Ministrisë së Jashtme të Kosovës.
“Kjo nuk është hera e parë që Serbia i shpërfill hapur zotimet e saj ndaj Bashkimit Evropian. Duke refuzuar njohjen e Kosovës dhe duke shtrembëruar parimet juridike ndërkombëtare, Serbia sfidon hapur detyrimet e saja të përcaktuara me nenet 1–5 të Marrëveshjes për Rrugën drejt Normalizimit, të arritur në kuadër të dialogut të Brukselit. Refuzimi i Serbisë për të zbatuar këto zotime konfirmon edhe më tej mungesën e vullnetit të mirë dhe sinqeritetit në procesin e normalizimit”, ishte reagimi nga MPJD.
Profesori i marrëdhënieve ndërkombëtare në Paris, Valon Murtezaj, e cilëson si lajm pozitiv njohjen e Kosovës nga Kenia.
Sipas tij kjo njohje ndihmon ne konsolidimin e shtetësisë së Kosovës në sistemin e marrëdhënieve ndërkombëtare.
“Njohja e Republikës së Kosovës ardhur nga Kenia është një lajm shumë pozitiv për vendin pas një periudhe të gjatë që nuk kemi dëgjuar lajmë për njohje bilaterale. Natyrisht që kjo shkon në funksion të konsolidimit të shtetësisë së Kosovës në sistemin e marrëdhënieve ndërkombëtare. Mesazhi për brenda tekstit të njohjes nga ajo çfarë kemi parë është që kjo shkon në funksion të konsolidimit të paqes globale. Pra synimin kryesorë e ka aty”, ka thënë Murtezaj për Tëvë1.
Murtezaj thotë se diplomacisë kosovare në këto vitet e fundit i ka munguar një strategji e mirëfilltë për të siguruar njohje të reja.
“Pavarësisht ndryshimeve gjeopolitike është detyrë e diplomacisë së Kosovës që të gjejë forma për të avancuar me interesat e saj në arenën globale. Diplomacia e Kosovës duhet të ketë strategji të gjithëmbarshme por edhe strategji individuale shtet për shtet”, vlerëson ai.
Ish-presidenti i Kosovës, Behgjet Pacolli, ishte i pari që njoftoi për njohjen e vendit nga Kenia.
Ai publikoi fotografi ne rrjetet sociale ku shihet ceremonia e nënshkrimit të dokumentit të njohjes nga Kenia.
