Fillimisht u intonua himni kombëtar.
E më pas, edhe himni shtetëror i Kosovës.
Kësisoj, kulla e Boletinëve, u mbush me mysafirë edhe një herë në prag të festës së 28 Nëntorit.
Krejt kjo në kuadër të Tribunës Shkencore “Roli i Isa Boletinit në shpalljen e Pavarësisë së Shqipërisë”.
Nxënësve të pranishëm, iu shpjegua se pse universiteti i Mitrovicës, e mban emrin e Heroit të Kosovës.
“Në vitin 1899 Isa Boletini hapi një shkollë privatë në pronën e tij private, në Boletin, ku mësonin fëmijët dhe nipërit e tij por edhe fëmijët e fshatrave përreth. Shkolla e hapur në kullën e tij, ishte një shenjë e ngritjes së vetëdijes kombëtare”, tha Edita Bekteshi – prorektore në universitetin “Isa Boletini”
E më në detaje, u thellua stërnipi i Isa Boletinit, Gazmendi.
“Mësuesi i parë, ishte hafiz Emër Efendiu, nga Zhabari i MItroivicës, një hoxhë i devotshëm, patriot, i cili kishte ardhur komplet me familjen me jetua në Boletin, dhe përveç fëmijët e Isa Boletinit, i ka mësuar edhe fëmijët e tjerë të zonës”, tregoi ai.
E më pas radha iu erdhi historianëve.
Pajazit Hajzeri nga Shoqata e Historianëve “Ali Hadri” tha se pesha e Isa Boletinit, nuk matet vetëm me shpalljen e pavarësisë së Shqipërisë.
“Kontributi i tij në shpalljen e Pavarësisë së Shqipërisë, nuk matet vetëm me aktin final me 28 nëntor, por me gjithë veprimtarinë e jetës së tij, e cila ishte tërësisht në shërbim të lirisë”, u shpreh ai.
Fjalë të mëdha për rolin e Isa Boletinit kishin edhe historianët nga Maqedonia e Veriut, Skender Hasani, e Sevdaim Demiri.
“Si asnjë familje tjetër, la kontribuues në vazhdimësi për çështjen kombëtare, deri te liria e sotme”, tha ai.
“Sado që mund të kalojnë vite dhe kohë, Isa Boletini mbetet figurë e pakontestueshme e historisë sonë kombëtare”, tha Demiri.
Në këtë ngjarje, nuk munguan as dhuratat.
Por, as shfaqjet artistike.
