Shkollat në Komunë të Podujevës po kanë probleme me furnizim me lëndë djegëse. Madje detyrohen që të marrin dru nga shkollat që kanë më shumë rezerva. Komuna ende nuk ka lidhur kontratë me ndonjë operator për furnizim me lëndë djegëse, sipas tyre kjo do të bëhet pas 5 ditëve.
Drunjtë po i marrin nga një shkollë tjetër.
E kjo formë po zbatohet në shumë prej shkollave në Komunën e Podujevës.
Njëra prej tyre është edhe shkolla fillore “Dr. Ibrahim Rugova”.
Madje drejtori i kësaj shkolle, Sheqir Krasniqi thotë se rezerva kanë vetëm deri të premten.
“Kuptohet që shkolla ka nevojë me furnizime me lëndë drunore ngase ka shpenzime të mëdha dhe kjo varet prej kushteve klimatike por sipas bisedës që kam zhvillu me drejtorin komunal të arsimit furnizimi me lëndë djegëse mund të filloi ditën e premte. Ne aktualisht qëndrojmë mirë dhe me rezerva të lëndëve djegëse mund të e shtyjmë edhe një javë cka kemi aktualisht”, ka deklaruar ai.
E për këtë, opozita fajin ua lë Komunës.
Kjo pasi ende nuk kanë lidhur një kontratë me ndonjë operatorë për lëndë djegëse.
“Komuna e Podujevës nuk ka kontraktuar asnjë operator ende për furnizimin me dru ose me lëndë djegëse nëpër shkolla. Pra jemi pa kontratë. Mënyra se qysh po ngrohen klasat nuk e di, kanë bërë zgjidhje afatshkurta por ende nuk kemi kontratë me asnjë operatorë për lëndë djegëse”, ka thënë asamblisti nga radhët e LDK-së, Qendrim Softolli.
Drejtori i Arsimit në Podujevë, Avni Fetahu tha se kanë kërkuar nga drejtorët e shkollave të furnizohen me dru nga ato shkolla që kanë më shumë rezerva.
Sipas tij, pas pesë ditëve do të lidhet kontrata.
“Për fat të mirë prej komisionit janë vlerësuar ofertat, sot bëhet njoftimi publik, procedura e thotë që duhet 5 ditë të qëndrojë njoftimi publik dhe pas 5 dite lidhet kontrata, uroj që të mos ketë ankesa dhe të vazhdohet me furnizim në ato shkolla ku është gjendja më kritike”, ka deklaruar ai.
Drejtori ndër të tjera tha se për tre vite radhazi nuk kanë pasur probleme me dru por me pelet dhe sipas tij këto probleme mund ti ndodhin çdo komune.
