Në ceremoninë e nënshkrimit për financimin e rrugës “Prishtinë – Mitrovicë” ministri i Financave, Punës dhe Transfereve, Hekuran Murati theksoi se me nënshkrimin e marrëveshjes në vlerë 53 milionë rijalë saudit përmbyllet edhe pjesa e mbetur e financimit të projektit për ndërtimin dhe rehabilitimin e rrugës “Prishtinë – Mitrovicë”.
Në komunikatë thuhet se ministri Murati theksoi përkushtimin e Qeverisë për të thelluar marrëdhëniet me Mbretërinë e Arabisë Saudite drejt investimeve në sektorin e infrastrukturës dhe sektorë të tjerë me rëndësi për zhvillimin ekonomik të vendit.
Nga ana e tij, Ministri i Mjedisit, Planifikimit Hapësinor dhe Infrastrukturës. Liburn Aliu tregoi se ky projekt synon modernizimin e rrugës dhe vjen në linjë me punët dhe prioritetet e Qeverisë të cilat çdo herë synojnë përmirësimin e jetës së qytetarëve.
Ministri Aliu gjithashtu theksoi se ky projekt është i pari projekt infrastrukturor në Kosovë që mbështetet nga Fondi Saudit për Zhvillim dhe se synohet që pas këtij projekti, partneriteti të thellohet edhe më tej.
Drejtori Ekzekutiv i Fondit Saudit për Zhvillim, Sultan A. Almarshad përmendi bashkëpunimin e vazhdueshëm me Qeverinë e Kosovës duke theksuar se projekti për financimin e magjistrales “Prishtinë – Mitrovicë” parasheh zgjerimin dhe rehabilitimin e rrugës nacionale duke e zvogëluar kështu edhe trafikun.
