Këtë të diele në presidencë, e para e shtetit Vjosa Osmani, priti në takim nënsekretaren Amerikane për Diplomacinë Publike, Elizabeth Allen.
Takimi me dyer të mbyllura mes Osmanit dhe diplomates Allen zgjati rreth gjysmë ore.
Pas përfundimit të takimit, Osmani dhe Allen nënshkruan marrëveshje mirëkuptimi për t’i bashkuar forcat kundër manipulimit të informacionit nga shtetet e huaja.
Presidentja e vendit në konference për medie tha se fushatat dezinformuese paraqesin një kërcënim të madh për stabilitetin e sigurinë kombëtare të Kosovës.
“Të ballafaquar me sfida të paprecedenta globale, fushatat dezinformuese paraqesin një kërcënim të madh për stabilitetin e sigurinë kombëtare të Kosovës, por edhe të Ballkanit Perëndimor në tërësi. Këto fushata synojnë të mbjellin frikë, të manipulojnë opinionin publik dhe të minojnë besimin në institucione demokratike. Por, mbi të gjitha duan të cenojnë demokracinë e vlerat demokratike që qëndrojnë në themelet e shteteve tona”, tha Osmani.
Në anën tjetër diplomatja amerikane, Elizabeth Allen, tregoi që përveç diskutimeve që zhvilloi me presidenten Osmani për çështje të sigurisë, ajo e nënvizoi edhe rëndësinë e themelimit të Asociacionit të komunave me shumicë serbe në mënyrë që Kosova të bëjë progres në rrugën euroatlantike.
“Me presidenten këtë mëngjes patën një diskutim produktiv lidhur me dezinformimin, politikbërjen, mbështetjen për shoqërinë civile dhe angazhimin multilateral. Folëm po ashtu për çështjen kritike, të rrugës evropiane dhe euroatlantike të Kosovës. Ritheksova që mund ta mbështesim më së miri rrugëtimin e Kosovës drejt institucioneve evropiane dhe euroatlantike kur kemi bashkëpunim e koordinim të ngushtë. E di që kjo është çështje shumë me rëndësi edhe për ju. E diskutuam hapin esencial drejt rrugës euroatlantike të Kosovës – lëvizja përpara e Kosovës për Asociacionin e Komunave me Shumicë Serbe”, tha Allen.
Pas Osmanit, Elizabeth Allen zhvilloi takim edhe me kryeministrin e vendit, Albin Kurtin.
Pas takimit me shefin e ekzekutivit kosovar, Allen me një postim në rrjetin social X tha se pati një diskutim gjithëpërfshirës me kryeministrin Kurti, dhe se Kosova i takon BE-së dhe NATO-s.
Krejt në fund nënsekretarja amerikane, kërkoi që të gjitha marrëveshjet mes Kosovës dhe Serbisë të gjejnë zbatim.
