Nënkryetarja e Komunës së Leposaviqit, Marina Bogojeviq, është ndaluar dje nën dyshimin se në objektin e komunës, ka sulmuar fizikisht një grua që kishte kërkuar vendim mbi largimin nga puna.
Rastin e ka konfirmuar, zëvendëskomandanti i Policisë së Kosovës për rajonin e veriut, Veton Elshani i cili tha se për rastin nënkryetarja e komunës së Leposaviqit, Marina Bogojeviq është intervistuar dhe më pas është liruar në procedurë të rregullt.
“Ne kemi pranuar një informacion se një ish-zyrtare, ta quajmë tash është sulmuar nga nënkryetarja e Komunës së Leposaviqit. Kemi intervistuar nënkryetaren në cilësinë e personit të dyshimtë për rastin. Nuk ka persona të ndaluar dhe të arrestuar ka pas një intervistim i cili është zhvilluar dhe është liruar në procedurë të rregullt”, tha ai.
Shkaku i këtij sulmi dyshohet të jetë se zyrtarja komunale ishte e punësuar me kontratë mbi vepër.
“Nuk kam shumë mundësi të flas për rastin sepse është pjesë e hetimit, por kemi informacione se zyrtarja ka qenë me kontratë mbi vepër dhe nuk ka pas afat, problemi ka ndodhur aty”, deklaroi Elshani.
Lidhur me sulmin në komunën e Leposaviqit për KosovaPress kanë dhënë detaje edhe nga Prokuroria Themelore në Mirrovicës. Sipas zëdhënsit për media të kësaj Prokurorie, Valon Preteni dyshohet që nënkryetarja e kësaj komune, Marina Bogojeviq e ka shtyrë zyrtaren tjetër komunale. Ai thotë se nuk ka persona të lënduar, dhe se prokuroria ka hap rast ndaj nënkryetares së Leposaviqit për veprën penale “Sulm”.
“Dyshohet që në Komunën e Leposaviqit dy persona janë përfshirë në një rast një zyrtare e Komunës së Leposaviqit dyshohet që e ka sulmuar duke e shtyrë një zyrtare tjetër është intervistuar e dyshuara dhe është hapur rast për veprën penale sulmi rasti do të trajtohet nga Prokuroria Themelore në Mitrovicë… nuk ka lëndime vetëm e ka shtyer”, tha ai.
Ndërsa, përmes telefonit, nënkryetarja e Leposaviqit, Marina Bogojeviq i tha KosovaPress-it se me zyrtaren komunale ka pas konflikt verbal dhe për këtë ka dëshmitarë.
Ajo theksoi se shkaqet nuk i di, pasi çdo kërkesë e ish-punëtores së zyrës së saj i janë ofruar.
“Ka qenë punëtore e imja për dy vite tek zyra ime. Kemi pas konflikt verbal kam dëshmitarë zyrtarët komunal dhe qytetarë që rastisën të jenë aty. Nuk e di për çfarë qëllimi ka pas ajo të gjitha dokumentet që ka kërkuar ia kemi ofruar”, tha ajo.
Në raportin 24 orësh të Policisë së Kosovës lidhur me këtë rast është raportuar se një person është arrestuar.
