Ka 26 vite që ende nuk di asgjë për fatin e motrës së saj.
Kjo pasi, Emine Shabani-Muhaxheri ishte zhdukur më 16 prill të 1999-ës gjatë luftës në Kosovë.
E lajmin për Eminen, Lule Shabani Rexhepi, nuk mundet ta pranojë as tani.
“U bënë 26 vjet, sot nuk kemi kurrfarë lajmi, asnjë shenjë prej saj. Diçka nuk mund të arrij në konkluzion që është e vdekur, mirëpo edhe e gjallë, 26 vjet shumë janë”, shprehet ajo.
Dhimbjen që ka, mundohet ta zbut me kujtimet më të mira për të.
“Po si motra me motrën, çka me thënë, raportet ishin më të mirat. Ajo ka qenë më e madhja prej familjes tonë, ka qenë shumë, shumë burrnore, por çka me bo, fati paska dashur kështu. Nënës tonë i mbetën sytë të qelë pa e ditur fatin e fëmijës së vet, që se diti kurrë ku është”, shprehet Lule Rexhepi.
E shpresa për gjetjen e trupit të motrës ka edhe sot e kësaj dite.
“Pak janë duke punuar, çdo qeveri që ka ardhur ka bërë pak ose asgjë për ta. Mirëpo, shpresa vdes e fundit, kjo është fjalë ngushëllimi edhe për ne”, thotë ajo.
Të njëjtin mall ka edhe Arbenita Muhaxheri, pasi nëna e saj është në mesin e 15 personave të zhdukur në Ferizaj.
“Kur e kam përshëndetur atë ditë dhe kur më tha të kujdesem për vëllezërit. Ka dalë për disa blerje në qytet dhe është kidnapuar. Normalisht, familja ime në Ferizaj njihet për kontributin që e ka dhënë në luftë, dhe ne ishim në shënjestër të tyre, dhe ajo pati fatin ta pësojë”, thotë ajo.
Ajo tani thotë se shpresë se do ta gjejë nënën e saj nuk ka më.
“Shumë është e dhimbshme që edhe pas 26 vjetësh nuk dihet ku prehet trupi i saj dhe i shumë të tjerëve. Normalisht, ne nuk jemi të qetë dhe nuk do të ndalemi deri sa të arrijmë në gjetjen e tyre. Deri në një kohë kam pasur shpresë që do të bëjnë diçka edhe institucionet, por tashmë i kemi humbur gjithë shpresën”, shprehet Rexhepi.
Në nderim të 15 të zhdukurve në Ferizaj, të mërkurën u mbajtën homazhe te Obelisku në këtë komunë.
