Tmerrin që kishte përjetuar 26 vite më parë, e ka të freskët edhe sot.
E pasojat e plagëve që mori si i burgosur në burgun e Dubravës, Bedri Kukala thotë se i vuan edhe tani.
“…Po më duket së më është ndal memoria në atë ditë kur ka ndodhë kjo se është kujtim shumë i rëndë na janë vra djemtë më të mirë. Jemi plagos ne që sot e vuajmë në çdo aspekt fizikisht e psiqikisht e vuajmë këtë masakër”, thotë ai.
E kujtimet për masakrën nuk i ka harruar as i mbijetuari tjetër, Hasan Berisha.
Berisha thotë se as vetë nuk di se si i ka shpëtuar dorës së armikut serb.
“Mu ngjallën kujtimet për shokët tonë..Këtu kam ndenjur 6 muaj, edhe masakrën e kam përjetuar këtu sot 26 vite më parë në këtë vend këtu na kanë rreshtuar e na kanë pushkatuar. Nuk e di si kam shpëtu, në mes kemi qenë sikur një tufë dele ashtu kemi qenë por fati e deshi, askush nuk e kemi ditë se ku me dalë për me shpëtua”, shprehet Berisha.
Nën emocione, Berisha thekson se nuk beson në drejtësi.
“Nuk besoj në drejtësi shumë pak besoj, mu ka zbehë besimi në Zot besoj. Në Hagë i kemi çlirimtarët e nuk besoj në drejtësi se është duke na u bë një padrejtësi e madhe shumë”, thotë ai.
Nga dora e armikut serb pësoi edhe i burgosuri, Jonuz Krasniqi.
Nëna e tij, tregoi për televizionin momentin kur kishte marrë vesh se i biri i saj ishte vrarë.
“Në masakër të Dubravës ma kanë vra atë emër, ma kanë shkrumu ka bo çka ka deshtë vetë Serbia. Kur e kemi marrë lajmin e djalit më vështirë e më rëndë më sikur me më pas ra krejt qielli në tokë e me u bë bashkë ashtu mu ka doke mua dhe familjes time…Më i pari është kanë se harroj deri sa të shkoj te ai, me pyet se sa plumba e kanë vra”, thotë ajo.
Masakra e Dubravës konsiderohet si një nga masakrat më të mëdha të regjimit serb të kryer ndaj popullit shqiptarë.
