Kryetari i komunës së Zubin Potokut, Izmir Zeqriri është larguar nga objekti i komunës nën asistimin e Policisë së Kosovës, rreth orës 20:00.
Gazetari i Tëvë 1, Valmir Gallopeni në një lidhje direkte nga kjo komunë ka thënë se ai është shoqëruar në formë të njëjtë siç edhe ka hyrë.
“Kryetari i ri është larguar nga objekti i komunës. Ai është larguar në shoqërimin e pjesëtareve të Policë së Kosovës në formë të njëjtë siç ka hyrë edhe në objekt, vetëm se në kohën kur ka hyrë ka pasur qytetarë të cilët janë munduar që të pengojnë atë. Ashtu ka ndodhur edhe në dy komunat e tjera, ku me asistimin e policë kanë arritur që të hynë brenda në ditën e parë të punës së tyre”, ka thënë ai.
Ai tha se kryetari i ka thënë ekipit të Tëvë1 se kërkesa e parë që të largohet flamuri serb dhe të vendoset ai i Kosovës ka qenë puna e parë e tij.
“Gjatë ditës kemi pasur një intervistë më kryetarin, i cili tha se dita e parë ka qenë interesante pasi ishte në një formë të veçantë, pra në formën se si e ka marrë detyrën për shkak të situatës së tensionuar. Ai ka thënë se një pjesë e madhe e qytetarëve serb mezi presin që ai të fillojë punën si kryetarë dhe të merret me hallet dhe brengat e tyre. Kjo pasi sipas tij, ata janë në një hallë të madhe nga strukturat paralele që po ia pamundësojnë që të jenë të lirë. Zeqiri po ashtu ka thënë se këto struktura e kanë kontrolluar edhe procesin e zgjedhjeve. Pra, i kanë kontrolluar qytetarët që të mos dalin të votojnë”.
