Zyrtarët doganorë në Pikëkalimin Kufitar të Vermicës kanë ndaluar për kontroll të detajuar një automjet që po tentonte të shmangte pikën e kontrollit gjatë hyrjes në territorin e Republikës së Kosovës.
Gjatë kontrollit, megjithëse drejtuesi kishte deklaruar se nuk kishte mallra për deklarim, në bagazhin e automjetit u zbuluan disa pako të mbushura me produkte kozmetike dhe farmaceutike të padeklaruara, pa fatura apo dokumentacion përkatës.
Sipas Doganës së Kosovës, mallrat përfshinin kremra, serume dhe tonera për kujdes të lëkurës – Solucione për trajtime dermo-estetike – Filler për buzë dhe fytyrë – Pajisje për microneedling dhe derma roller -Vitamina dhe suplemente (Vitamin D3, Devit, Feroven) – Solucione injektuese dhe produkte për trajtim të flokëve.
Dogana ka njoftuar se vlera totale e mallrave të ndaluara llogaritet rreth 3,300 euro.
Ndaj personit është iniciuar procedurë për kundërvajtje doganore, në bazë të nenit 244 të Kodit Doganor dhe të Akcizës së Kosovës, ndërsa mallrat janë konfiskuar deri në përfundimin e procedurave ligjore.
