Intonimi i himnit të Republikës së Kosovës lëshohet në fillim.
Kështu nis seanca solemne me rastin e 17 vjetorit të Pavarësisë së Kosovës në komunën e Mitrovicës së Veriut.
Kryetari i kësaj komune, Erden Atiq uroi qytetarët e komunës veriore por, ai shtoi se Serbia po vazhdon të përbëj kërcënim për vendin.
“I vetmi shtet në mes të Evropës që mbetet lidhur me Rusinë sot është Serbia. Serbia nuk e fsheh aspak qëllimin e saj, destabilizimin e saj dhe ndarjen faktike të shtetit tonë. Serbia na lufton brenda dhe jashtë pa zgjedhur mjete prej diplomacisë e deri te financimi dhe kontrollimi i grupeve kriminale brenda vendit tonë”.
E Kryesuesi i kuvendit komunal, Nexhat Ugljanin kujtoi dëshmorët dhe heronjtë që dhanë jetën për të gëzuar sot lirinë.
“Kujtojmë dëshmorët dhe heronjtë që dhanë jetën për këtë ditë. Në këto 17 vite të shtetësisë tonë, Kosova ka bërë hapa të rëndësishëm në ndërtimin e institucioneve demokratike, forcimin e shtetit ligjor dhe zhvillimin ekonomik, mbetët për tu bërë punë më shumë andaj jemi këtu për të kontribuar të bëhet më e fuqishme, më të zhvilluar dhe gjithëpërfshirëse për të gjithë qytetarët e saj”, ka deklaruar ai.
E situata e sigurisë në veri mbetet e qetë.
Zëvendësdrejtori i Policisë për rajonin e veriut, Veton Elshani tha për Tëvë1 se dallimi me vitin e kaluar të përvjetorit të pavarësisë është i madh.
“Ka shumë aktivitete që zhvillohen në këtë vend, mirëpo ne jemi polic që goxja kaherë e mbaj në mend dhe ditën e Pavarësisë me krahasua atë ditë me këtë ditë të sodit përsëri ka dallime të mëdha është një punë e mirë që është bërë e kemi meritua gjithë këtë ditë”, ka thënë ai.
Komuna e Mitrovicës së Veriut as këtë vit nuk organizoi aktivitete me rastin e përvjetorit të shpalljes së pavarësisë së shtetit.
