Shtatë telefona, një ekran i iPhone 7, gjashtë adaptera, një palë kufje dhe substancë e dyshuar narkotike janë gjetur të mërkurën nga zyrtarët korrektues në Qendrën Korrektuese të Dubravës.
Sipas njoftimit, sendet e dyshimta janë hasur brenda një qeseje të mbyllur në një pako qumështi, pas një kontrolli të detajuar gjatë patrullimit të perimetrit të jashtëm dhe zonave përreth që sipas komunikatës synimi ishte të futen në mënyrë të kontrabanduar
Lidhur me rastin është njoftuar Policia si dhe është themeluar një Komision Hetimor i brendshëm.
“Gjatë patrullimit të perimetrit të jashtëm dhe zonave përreth, janë hasur sende të dyshimta. Pas kontrollit të detajuar, u gjet një qese e mbyllur, brenda së cilës, në një pako qumështi, ishin fshehur 7 telefona, 1 ekran i iPhone 7, 6 adaptera, 1 palë kufje dhe substancë e dyshuar narkotike. Lidhur me rastin, është themeluar një Komision Hetimor i brendshëm, dhe Policia është njoftuar për veprime të mëtejshme. Shërbimi Korrektues i Kosovës mbetet i përkushtuar në luftimin e kontrabandës brenda institucioneve korrektuese dhe do të vazhdojë të marrë masa të forta për të garantuar rendin dhe sigurinë”, thuhet në njoftim./teve1.info/