Në rreshtin e parë të sallës, ulur me një buzëqeshje të qetë e me një shenjë rozë në jakë, qëndron Nafije Latifi, gruaja që i mbijetoi kancerit të gjirit.
Përballë saj, mjekë, infermierë dhe ekspertë nga rajoni folën për sfidat në trajtimin e kësaj sëmundjeje.
Por për Nafijen, çdo fjalë në konferencën e Kongresit Ndërkombëtar “Kanceri i gjirit dhe sfidat e tij”, është kujtim, betejë dhe fitore.
“Po ju drejtohem me një ndjenjë mirënjoheje për rrugën e kaluar por edhe me shqetësim për sfidat që ende mbetën. Le të jetë ky tetor një thirrje e fuqishme për më shumë veprim solidaritet dhe përkushtim të vërtetë”, tha Latifi.
E pranishme në këtë konferencë ishte edhe ish presidentja e Republikës së Kosovës Atifete Jahjaga e cila tha që shëndetësia mbetet një nga prioritet e saj.
“Është një nder i veçantë që të jem në mesin tuaj sot këtu në këtë konferencë kushtuar një teme që prek jo vetëm shëndetin por edhe dinjitetin shpresën dhe jetën e mijërave grave në luftën kundër kancerit të gjirit, luftë kjo që kërkon dije kërkon përkushtim por mbi të gjitha kërkon zemër”, tha Jahjaga.
Në anën tjetër një fjalë rasti e tha edhe Drejtori e Klinikës Onkologjike, Ilir Kurtishi.
“Në klinikën tonë përpos metodave tona të specializuara të trajtimit ne kemi barna super modern për trajtimin e sëmundjeve malinje të gjirit, të linjës së parë e të linjës së dytë së fundmi, barna të cilat kanë impakt në trajtimin modern”, deklaroi ai.
Në kuadër të Muajit të Ndërgjegjësimit, Shoqata e Teknikëve të Radioterapisë Onkologjike të Kosovës ka organizuar Kongresin Ndërkombëtar për “Kancerin i gjirit dhe sfidat e tij” i cili do të zgjasë deri ditën e shtunë, ku do trajtohen prezantime shkencore nga ekspert të ndryshëm.
Kronikë e realizuar nga gazetarja Jona Kelmendi.
