Pakot e para arritën.
E origjina e tyre, është Qendra e Mbretit Selman për Bamirësi dhe Ndihma Humanitare në Arabinë Saudite.
Përmes shoqatës “Bereqeti” në Kosovë, këto pako do të shkojnë në shtëpitë e familjeve në nevojë.
Këta të fundit, arritën me kohë tek xhamia e lagjes “Arbëria” në Prishtinë.
Në ora 10:00 filloi edhe shpërndarja e pakove ushqimore në prag të muajit Ramazan.
Falënderues për ndihmën saudite, u shpreh myftiu i Kosovës, Naim Tërnava.
“Tash e 26 vjet në vazhdimësi, këto ndihma kanë vazhduar dhe për këtë ne jemi falënderues nga zemra, në të vërtetë ka qenë një ndihme e madhe jo vetëm për ushqim dhe veshmbathje por ka qenë një ndihmë e vazhdueshme, edhe në ndërtimin dhe rindërtimin e objekteve të shkatërruara gjatë luftës, të shtëpive, të spitaleve, të xhamive. Arabia Saudite ka qenë edhe është partnere e Kosovës e cila ka përkrahur Kosovën në anëtarësimin brenda të gjitha mekanizmave ndërkombëtar ku ka pasur nevojë Kosova”,u shpreh Tërnava.
E prezent këtu ishin edhe donatorët.
Ambasadori i Arabisë Saudite, Faisal Hivzi, tha se ndihmat e tilla i bashkojnë popujt.
“Kjo ndihmë vjen si mbështetje e mbretit të Arabisë Saudite, i cili beson se këto ndihma bëjnë bashkimin ndërmjet popujve dhe është një ndihmë e madhe për nevojtarët. Këto pako ushqimore që vijnë vit për vite nga Arabia Saudite, nuk janë ndonjë ndihmë e madhe, por është një treguese për mbështetjen që ka Arabia Saudite dhe bashkëpunim të mirë që ndodhë ndërmjet Arabisë Saudite dhe Bashkësi Islame”, tha ambasadori i Arabisë Saudite, Faisal Hivzi.
Falënderuese për këto pako ushqimore u shpreh edhe drejtoresha për punës sociale në Prishtinë, Adelina Sahiti.
“Shoqata Bereqeti bashkë me donatorët e saj në këtë rast Arabinë Saudite kanë qenë ata ë cilët po na bashkohen që ta nisim mbarë muajin e shenjtë të Ramazanit. Nuk ka më mirë që të pranojmë dhurata e nuk ka me mirë që të dhurojmë dhurata”, tha ajo.
Por jo vetëm në Prishtinë, pakot ushqimore pritet të dhurohen edhe në qytete tjera të Kosovës.
“Në prag të muajit të madhërishëm të Ramazanit ku do të shpërndajmë mbi 8 mijë për 8 mijë familje në nivel vendi. Ky është viti i katërt që na mbështet kjo qendër me pako ushqimore në prag të muajit të madhërishëm të Ramazanit, kjo pasi kjo Qendër na mbështetë neve edhe 700 jetimë të cilëve u jep nga 50 euro në çdo muaj, këtu po bëhet hapja e këtij projekti e ne do të jemi në çdo qendër të Kosovës deri në ditën e parë të muajit të Ramazanit”, Xheladin Fazliu nga shoqata “Bereqeti”
Gjatë këtij eventi, Komuna e Prishtinës, ndau mirënjohje për ambasadorin e Arabisë Saudite dhe kryemyftiut, Naim Tërrnava, për kontributin e dhënë.
