Në prag të shënimit të 25 vjetorit të themelimit të Policisë së Kosovës, janë organizuar një sërë aktivitetesh të ndryshme, përfshirë edhe garat sportive në futboll të cilat po mbahen sot në Obiliq.
Në këtë organizim po marrin pjesë drejtori i Përgjithshëm i Policisë së Kosovës, Gazmend Hoxha, përfaqësues nga autoritetet komunale dhe menaxhmenti i PK-së.
Drejtori i Divizionit të Njësive Speciale, Amir Gërguri njëkohësisht kryesues i Këshillit Organizativ për aktivitet sportive për nder të këtij përvjetori, tha se më këtë organizim Policia e Kosovës tregon një anë tjetër të medaljes, përveç angazhimit dhe detyrave të tyre në terren.
Ai tha se pjesëmarrja e tyre në këto aktivitete tregon një anë të veçantë të tyre, për çka thotë se edhe policët si qytetarë të Kosovës mund ta tregojnë veten në këto sporte.
“Ky aktivitet sportiv ka filluar para tre muajve, ku kemi pasur aktivitete të ndryshme, të shumta brenda policisë, duke u nisur prej garave në nivel lokal në futboll, pastaj në volejboll, në qitje, në atletikë, në disiplinën e shahit dhe kulmi është sot, aktiviteti final në futboll…Këto aktivitete sportive i kemi periodike çdo vit por këtë vit për nder të 25 vjetorit të Policisë së Kosovës, ka qenë më masive dje gara ka qenë shumë e fortë, përkundër krejt angazhimeve që Policia e Kosovës që i ka, për detyrat e veta që i kryen në terren. Këtë herë kemi gjetur kohë dhe iu kemi përkushtuar për ta shënuar këtë përvjetor të veçantë jubilar të Policisë së Kosovës”, tha Gërguri.
Gërguri potencoi se janë në proces të anëtarësimit të klubeve në shah, xhudo, volejboll e sporte të tjera.
Përveç kësaj, ai nënvizoi faktin se kanë arritur të krijojnë shoqatën sportive të Policisë së Kosovës.
“Përveç detyrës së Policisë, gjithmonë në jetën time jam marrë me sport dhe aktivitet sportive tash e kanë një ritëm tjetër. Brenda Policisë së Kosovës kemi arritur që të krijojmë edhe shoqatën sportive të Policisë së Kosovës dhe jemi në fazën e anëtarësimit të klubeve edhe në shah, qitje, xhudo, atletikë, volejboll, basketboll dhe futboll. Me këtë, policia tregon një anë tjetër të medaljes. Një anë të veçantë për shkak se edhe policët janë qytetarë të Kosovës, edhe policët munden dhe do të tregojnë veten edhe në aktivitete sportive”, potencoi Gërguri.
Më 6 shtator 1999, Misioni i OSBE-së në Kosovë, në pajtim me Rezolutën e Kombeve të Bashkuara 1244, ka hapur Shkollën e Policisë dhe ka filluar trajnimin e kandidatëve për pjesëtarë të Policisë së Kosovës.
Gjenerata e parë e kandidatëve për pjesëtarë të këtij Shërbimi filloi trajnimin në këtë qendër më 6 shtator 1999./KP
