Përgatitjet e fundit u bënë.
Edhe kryetari i Komunës së Podujevës, Shpejtim Bulliqi bashkë me ministrin në detyrë të Shëndetësisë, Arben Vitinë, erdhën për ta pritur.
Kryeministri në detyrë, Albin Kurti erdhi në qytetin e Podujevës për t’a përuruar shërbimin më të ri mjekësor në këtë komunë.
Nga sot, qytetarët që kanë nevojë për shërbimin e dializës do ta kenë mundësinë që ta kryejnë pa bërë më rrugë të gjatë.
Derisa Kurti u shpreh se ky është lajm i mirë për të gjithë pacientët dhe familjet e tyre pasi nuk do kenë më nevojë të udhëtojnë jashtë qytetit.
E Bulliqi u shpreh se funksionalizimi i këtij shërbimi është një zhvillim i rëndësishëm për qytetin.
“Është moment i veçantë për qytetarët e komunës sonë për arsye se nga sot e tutje për 32 pacientë të cilët kanë nevojë për këtë shërbim nuk do të kenë nevojë të bëjnë rrugë të gjata nga vise të ndryshme rurale gjithandej komunës dhe të shkojnë në Prishtinë për t’i kryer këto shërbime. Është shumë e rëndësishme që Ministria e Shëndetësisë dhe qeveria e vendit na ka ndihmuar shumë në këtë proces. Është një projekt në vlerë prej 2.5 milionë euro që janë investuar deri më tash në total. 1.9 milion të fundit edhe në aparatura. Objekti është ndërtuar me buxhetin e komunës”, tha Bulliqi.
Ndërkaq, ministri në detyrë i Shëndetësisë tha se përveç shërbimit të hemodializës, në spitalin e Podujevës shumë shpejtë do të ofrohen edhe shërbime të tjera specialistike.
“Tash po fillojmë me shërbimin e hemodializës. Për pak siç e tha kryetari do të fillojmë edhe me shërbime specialistike dhe tani të gjithë qytetarët e Komunës së Podujevës jo vetëm hemodializën që iu janë dashur të udhëtojnë deri në 80 e 90 kilometra për ta marrë këtë shërbim në komunën e Prishtinës, tash do ta marrin këtu. Së shpejti qytetarët e Komunës së Podujevës për çdo shërbim specialistik do ta kenë edhe vendin me një investim 2.5 milionë eurosh në bashkëpunim me Komunën e Podujevës”, tha Vitia.
E drejtoresha e Nefrologjisë në QKUK, Mimoza Ukimeraj, tha se pacientët nga Podujeva me hemodializë, deri para dhjetë vitesh janë trajtuar në Nefrologji ndërsa më pas ky shërbim u është ofruar në qendrën satelit në Kodrën e Trimave.
“Pacientët që kanë nevojë për këtë shërbim do ta marrin në vendin e vet. Shumica e pacientëve janë edhe me shtëpi këtu afër poliklinikës. Këta pacientë shërbimin e kanë marrë në Qendrën Klinike Universitare ët Kosovës, në Klinikën e Nefrologjisë. Kurse dhjetë vitet e fundit për të pasur një rrugë më të shkurtër realizmin e seancave të dializës e kanë bërë në qendrën satelit në Kodrën e Trimave…Jemi një procedurat e tenderimit për të mbuluar të gjitha aparatet edhe në QKUK. Po servisohen prej operatorëve ekonomik, janë funksional, po kryejnë seanca. Jemi në procedura të tenderimit të aparateve të reja dhe të renovimit”, tha Ukimeraj.
Hemodializa është procedurë mjekësore që përdoret për të pastruar gjakun te pacientët të cilët kanë dështim të veshkave ose mosfunksionim të rëndë të tyre.
