Me qëllim të përafrimit të Ballkanit me BE-në, ekziston një nisëm e quajtur “Procesi i Berlinit”.
E ambasadori i Gjermanisë në Kosovë, Jörn Rohde, përmes një postimi në Twitter ka bërë të ditur se më 3 nëntor do të mbahet një takim në kuadër të këtij Procesi.
Krahas Procesit të Berlinit, nismë kjo e ish-kancelares Angela Merkel, Shqipëria, Serbia e Maqedonia e Veriut ka kohë që kanë formuar edhe nismën Open Balkan, e cila ka përafërsisht qëllime të njëjta, por nuk ka arritur të përfshijë më vete të gjitha vendet e rajonit.
Njohësi i çështjeve politike, Melazim Koci, thotë se vetëm për Serbinë “Open Ballkan” është më i përshtatshëm se sa “Procesi i Berlinit”.
“Unë mendoj që “Ballkani i Hapur” është plasuar për ta “minuar procesin e Berlinit”, këtë e ka bërë Serbia me qëllim të shmangies së obligimeve që dalin nga “Procesi i Berlinit” dhe shkak ka qenë Kosova. Në “Procesin e Berlinit” parashihen gjashtë subjekte të barabarta shtetërore, ky ka qenë qëllimi i minimit nga ana e Serbisë. Edhe tash jam skeptik, dyshoj se “Procesin e Berlinit| sërish Serbia mund ta minoi për të mos e pranuar Kosovën e barabartë në tavolinë”, ka thënë Koci.
Por, ndryshe mendon, Kandidati i CDU-së gjermane për Bundestagun, Kolë Gjoka. Ai thotë se mungesa e rezultateve nga “Procesi i Berlinit” solli nismën “Open Ballkan”.
“Unë kam qenë vet pjesëmarrës i konferencës së Berlinit të iniciuar nga zonja Merkel dhe fatkeqësisht unë e shikoj në këtë prizmin që deri më sot në Ballkanin perëndimor nga ky proces nuk ka asnjë lloj lëvizje … Patjetër lindi nevoja për krijimin e një mekanizmi tjetër siç ishte Ballkan Open, që ndoshta ju bë si konkurrencë kësaj ose ndoshta ishte pikërisht kjo nismë e re e cila e nxit ose e ri-nxiti nismën e Ballkanit Perëndimor”, ka thënë Gjoka.
Për ri-vitalizimin e procesit të Berlinit këtë vjeshtë, pati paralajmëruar edhe vet kancelari gjerman Olaf Scholz gjatë vizitës së tij në Prishtinë në muajin qershor.
Kronika e realizuar nga Valmir Gallopeni
