Gjurmë të zjarrit kanë mbetur ende.
Të martën flakët përshkuan afro 10 hektarë tokë, në fshatin Dubravë të Suharekës.
Për pasojë u shkaktuan dëme bujqësore.
Atdhedon Maliqit iu dogjën 60 topa kashtë, ani pse me bashkëfshatarët bënë përpjekje për të shpëtuar ushqimin e kafshëve nuk arritën dot.
“Na ka shkaktu dëm diku 60 topa, që kanë qenë këtu, ku shihet se jemi mundu m’i shpëtu këto, por andej është kallë krejt”, u shpreh Atdhedon Maliqi, banor.
E gjithë kjo besohet të ketë ardhur nga pakujdesia e banorëve.
“Ma merr mendja që ndonjë qytetar i pacivilizuar e ka bërë dëm, se nuk ka mundur të digjet vet” thotë ai.
Mirëpo, fshati Dubravë nuk ishte vatra e vetme e zjarrit.
Në dy lokacione të tjera në Suharekë, u angazhuan në zjarrfikje, zjarrfikësit e kësaj komune.
Këta në betejën për shuarjen e zjarrit ishin vetëm dy.
“Dje ka qenë një ditë ku kemi pas zjarre më së shumti, dhe kemi qenë pothuasje 24 orë të angazhuar në fikjen e zjarrit, vlen të ceket një zjarr që ka filluar me 15.07 në malet e Cerrit në trekëndëshin, Rahovec, Suharekë dhe Malishevë”, tha Vehbi Krasniqi- Komandant i Zjarrfikësve në Suharekë.
Shkak i numrit të paktë të stafit, ekipeve në teren u dolën në ndihmë banorët e zonave.
“Jemi shumë pak zjarrfikës, kështu që jam detyruar që nga një zjarrfikës me dërgu në çdo pikë të zjarrit, ku me ndihmën e qytetarëve kanë arritur që t’i lokalizojnë vatrat e zjarreve”, tregon Krasniqi.
Në teren kishin dalë edhe ekipet policore.
“Kanë dalë në vendin e ngjarjes, dhe sipas ekipeve në teren dëmet nuk kanë qenë të mëdha dhe nuk ka pasë ndonjë dyshim që të iniciohet ndonjë rast”, ka thënë zëdhënsi i PK-së, Vesel Gashi.
Nga këto institucione u bë apel për kujdes të shtuar për çdo veprim që mund të nxisë nisjen e ndonjë zjarri.
