Ka përfunduar seanca e jashtëzakonshme e Kuvendit të Kosovës e mbajtur me kërkesë të Grupit Parlamentar të AAK-së, ku u diskutua çështja e furnizimit me ushqim për Forcën e Sigurisë së Kosovës.
Në mungesë kuorumi, nënkryetari i Kuvendit të Kosovës, Enver Hoxhaj e shpalli të mbyllur seancën.
“Meqë nuk ka kuorum dhe të tjerë të paraqitur për fjalë, unë i ndërpres punimet e kësaj seance dhe për vazhdimin e saj do t’iu informojmë si kryesi e kuvendit”, tha ai.
Deputeti i Aleancës për Ardhmërinë e Kosovës(AAK), Bekë Berisha, paraqiti projekt-rezolutën në të cilën përveq kërkesës për zgjidhjen me urgjencë të çështjes së furnizimit me ushqim, kerkohej edhe dorëheqja e ministrit Maqedonci dhe zyrtarëve përgjegjës në Ministrinë e mbrojtjes.
“1. Kuvendi I Republikës së Kosovës kërkon nga Qeveria, Ministria e Mbrojtjes që me urgjencë të zgjidh çështjen e furnizimit me ushqim si dhe me të gjitha pajisjet e tjera të nevojshme 2. Zyrtarët përgjegjës në Ministrinë e mbrojtjes duhet të japin dorëheqje: Ministri i FSK-së, zv.ministri, sekretari i përgjithshëm dhe gjithë hierarkia përgjegjëse në administratën e ministrisë 3. Kërkohet nga prokuroria e shtetit që të hapet procedurë ligjore për të hetuar rastin duke përfshirë edhe dyshimet për FSK-në për çështjen që kanë të bëjnë me interesa korruptive”, thuhet në kërkesën e Berishës./teve1.info/
