Në objektin e Ministrisë për Administratë Publike të Kosovës (MAPL) në Mitrovicën e Veriut, është mbajtur takimi i parë i Bordit të Përbashkët, i kryesuar nga Elbert Krasniqi, përfaqësues i kryeministrit në detyrë.
Në këtë takim ishin të pranishëm kryeministri në detyrë, Albin Kurti, kryetari i Komunës së Mitrovicës së Veriut, Erden Atiq, nënkryetari Arian Tahiri dhe anëtarët e bordit nga të dy komunat.
“Ky bashkëpunim parashihet me ligjin për kufijtë administrativë të komunave i cili parashikon bashkëpunim të ngushtë ndërmjet dy komunave përmes krijimit të një Bordi të Përbashkët funksional. Themelimi i Bordit të Përbashkët ndërmjet Komunës së Mitrovicës së veriut dhe asaj të jugut vendos një model të ri bashkëpunimi institucional, që synon përmirësimin e jetës së përditshme të qytetarëve”, ka shkruar Krasniqi në një postim në Facebook.
Krasniqi bëri me dije se bordi i përbashkët vendos një model të ri bashkëpunimi institucional, që synon të tejkalojë ndarjet e së kaluarës dhe të ndihmojë në ndërtimin e besimit dhe rritjen e efikasitetit.
“Me pjesëmarrje të barabartë nga të dy komunat dhe nën mbikëqyrjen e përfaqësuesit të Kryeministrit, ky bashkëpunim është shembull i qeverisjes së mençur dhe përkushtimit ndaj interesit të qytetarëve, pa asnjë dallim”, ka shkruar tutje ai.
