Punimet në rrugën A, e cila lidh Veternikun me rrugën B, pritet të përfundojnë në shtator gjë e cila do të lehtësojë ndjeshëm trafikun në kryeqytet. Kështu ka thënë kryetari i Prishtinës Përparim Rama në një intervistë për KosovaPress, në të cilën ai flet për projektet gjatë mandatit të tij dhe sfidat me të cilat është përballur.
Rama thotë se bulevardi “Xhorxh Bush” do të përfundohet dhe do t’u shërbejë qytetarëve të kryeqytetit. Ai gjithashtu premtoi se, nëse fiton mandatin e dytë, do të zgjerojë mësimin gjithë ditor në të gjitha shkollat e Prishtinës.
I pari i kryeqytetit, konsideron se transformimi i “Kurrizit”, platforma që lidh Pallatin e Rinisë me lagjen “Arbëria”, parqet e shumta si dhe punimet në rrugën A, kanë ndikuar në transformimin e kryeqytetit. Ai beson që përkundër telasheve punimet në rrugën A do të përfundojnë deri në shtator të këtij viti.
“Projekti i Kurrizit nuk ka ndodhur që 45 vjet. Aty kemi transformuar një hapësirë fenomenale jo vetëm në aspektin e infrastrukturës, por edhe të artit e kulturës, po ashtu tash është planifikimi që të ketë një treg mobil gjatë vikendit. Projektet tjera madhore si platforma, e cila lidh Pallatin e Rinisë me “Arbërinë”, edhe ajo po ndodh përkundër faktit që na kanë bllokuar, por ne nuk ndalemi, se ata (MKRS) nuk kanë bazë ligjore. MKRS, kjo qeverisje, punon në mënyrë jo ligjore kundër Prishtinës e qytetarëve të saj. Kemi bërë një numër të madh të parqeve në të gjitha pjesët…. Po ashtu, projekte tjera madhore, rruga “Xhim Xhema”, rruga A që lidhet tashmë me rrugën B projekte që përmirësojnë jetën e qytetarëve, po ashtu i ndihmojnë trafikut, i cili edhe tash është në përfundim e sipër, projekt madhor që tri herë është dashur të luftohet me gjyqin, një vit na e ka humbur qeveria, pra gjykata duke luftuar në gjyq për një projekt të mirë për qytetin. Nuk ka pasur asnjë arsye që ajo të bllokohet…. Projekti Xhim Xhema, projekti i madh rruga A, do të përfundojë gjatë muajit shtator dhe do ta lidhim Veternikun me rrugën “Xhim Xhema” me rrugën B, e cila do ta krijojë një arterie të re që e liron dukshëm trafikun në kryeqytet”, shprehet Rama.
Smart City ose qyteti i mençur po konsiderohet edhe një hap tjetër me rëndësi për tejkalimin e telasheve me komunikacion në kryeqytet.
“Tash e kemi edhe smart city, qytetin e mençur, infrastrukturën harduer, ku e kemi lidhur semaforët. Tash kemi lidhjen e gjelbër që, për shembull, nëse hapet semafori i gjelbër në njërën pikë, vazhdon trafiku pa ndal, sepse e kemi ndërlidhur me sistem të mençur”, u shpreh ai.
Mos konstituimi i Kuvendit të ri të Kosovës ka bërë që Komuna e Prishtinës të mbetet pa buxhet, për shkak se votimi i buxhetit komunal ishte vonuar dhe nuk u realizua para miratimit të buxhetit për këtë vit nga Kuvendi.
Kryetari i Prishtinës, njëherësh kandidat për një mandat të dytë nga radhët e LDK-së, fajëson nivelin qendror për situatën e krijuar duke e cilësuar bllokimin e buxhetit si të paligjshëm. Sipas tij, pavarësisht pengesave nga qeverisja qendrore, puna për transformimin e kryeqytetit po vazhdon.
“E dini që vitin e kaluar, përkundër bllokadave e sabotimet që kemi pasur nga niveli qendror, kemi realizuar buxhetin në mënyrë rekorde, pra ka qenë realizimi më i madh historik dhe po shihen punët në kryeqytet në të gjitha sferat. Këtë për fat të keq, oponentët politikë e kanë shfrytëzuar për të na e bllokuar buxhetin totalisht, diçka që është jo ligjore dhe kundër qytetarëve të kryeqytetit. Pikërisht ata që thirren në atë se kinse ia duan të mirën kryeqytetit, nuk janë bashkëpunues, por janë bllokues. Mirëpo, kemi arritur t’i shtyjmë proceset përpara. E dimë që është vit zgjedhor dhe po bëjnë çmos të mos na lënë të punojmë. Mirëpo, ne po e vazhdojmë punën. .. Nuk dorëzohemi përballë bllokadave, shantazheve e sabotimeve të ndryshme që na vijnë, po vazhdojmë me transformim të punës, sepse e dimë çfarë i nevojitet kryeqytetit”, tha ai.
Sa i përket vazhdimit të punimeve në sheshin “Xhorxh Bush”, i pari i Prishtinës thotë se ky projekt do të realizohet përkundër bllokadave që po tentohen të bëhen nga Ministria e Kulturës.
“Ministria e Kulturës, pikërisht ky i vetëquajtur ministër që pretendon se e do (Prishtinën), e ka bllokuar Prishtinën që katër vjet në mënyrë jo ligjore. Normal që do t’i ndjekim të gjitha mënyrat. Projekti ynë nuk do të ndalet. E keni parë që ne kemi vazhduar (punimet) në bulevardin “Xhorxh Bush”, është ndër projektet më madhështore të kryeqytetit që krijon hapësira publike të mrekullueshme për sferat e jetës prej fëmijëve, të rinjtë, bizneset e deri te të moshuarit. Pra, është një projekt madhështor që gjithsesi vazhdon dhe do ta kryejmë“, tha Rama.
Gjatë këtij viti kryeqyteti shpesh u ballafaqua me telashe për menaxhim të mbeturinave, e për këtë Rama thotë se “Pastrimin” e kanë mbështetur, por problemi nuk qëndron te punëtorët, por menaxhmenti i kësaj kompanie.
“Ne i kemi ofruar ndihmë Pastrimit, duhet ristrukturuar, përmirësuar, por nuk mundet në strukturën ekzistuese të përmirësohet, sepse menaxhmenti i tanishëm i ka pamundësuar proceset për të zgjedhur problemin e mbeturinave. Çka kemi bërë, ne ia kemi shtuat sektorin privat dhe kemi krijuar një konkurrencë të shëndetshme mes Pastrimit dhe sektorit privat, dhe menjëherë ka filluar pastrimi i qytetit… Ia kemi thënë të gjitha kompetencat Pastrimit, ia kemi thënë fondet prapë nuk e pastron kryeqytetin, këtu nuk janë fajtorë punëtorët e Pastrimit, është fajtor menaxhmenti, edhe ne me të kemi problem në mandatin e dytë, ky menaxhment do të jetë out (jashtë)”, tha ai.
I pari i kryeqytetit si projekte me rëndësi përmend mësimin tërë-ditor, i cili beson që ka ndihmuar ekonomitë familjare, derisa theksoi edhe në mirëqenien e qytetarëve ka ndikuar unifikimi i biletës së Trafikut Urban në mes të sektorit publik dhe atij privat.
Kryetari aktual i Prishtinës beson se qytetarët do t’i japin votën edhe për një mandat të dytë.
“Uroj që të gjithë këta kandidat të kenë një garë të shëndosh, një garë të ideve, një garë që bien ide të mira për kryeqytetin dhe të fitojë më i miri. Qytetarët e kryeqytetit duhet gjithmonë ta zgjedhin njërin më profesionist, më adekuat, njeriun që di, do dhe ka profesionalizëm, është i guximshëm dhe i shtyn proceset përpara”, u shpreh ai.
Rama thotë se mandati i dytë do t’i jep mundësi ta transformojë kryeqytetin.
“Çdo gjë që e kam thënë që kam për të bëjë, jam duke e bërë. E kemi fituar besimin e qytetarëve, e kanë parë që nuk flasim vetëm filozofoi, pallavra, me thënë atë që e kemi thënë atë e bëjmë dhe i përfundojmë në mënyrën profesionale, në mënyrën më të mirë të mundshme..33’23 Unë kam thënë edhe para katër vjetëve, më duhen tetë vjet për ta transformuar kryeqytetin. Përkundër bllokadave, do t’i përfundojmë të gjitha projektet që kemi premtuar para katër vjetësh dhe do t’ua shtojmë atyre projektet, si fshati olimpik. Në kuadër të Lojërave Mediterane 2030 duhet ngritur kapacitetin me infrastrukturë sportive ku për fshatin olimpik në Bërnicë tashmë e kemi master-planin, dhe projektet që do t’i shtyjmë përpara, kemi kontratë, kemi krijuar organin menaxhues për lojërat olimpike dhe po i shtyjmë përpara… Do ta kemi mësimin tërë ditor në të gjitha shkollat, tash qytetin e mençur veç e kemi pjesë të kryeqytetit”, theksoi ai.
Në planin qeverisës gjatë mandatit të parë, Rama kishte paraparë edhe ndërtimin e spitalit të kryeqytetit, por projekti dhe hapësira e ndarë për këtë projekt është bllokuar nga niveli qendror.
Gjatë këtyre katër vjetëve problematike kanë qenë qentë endacakë, ku tashmë komuna ka ndërtuar një strehimore dhe ka nisur subvencionimin e qytetarëve që dëshirojnë adoptimin e tyre.
