Ndonëse ka nisur procesi mësimor, prindërit janë akoma në kërkim të librave shkollorë. E ky proces sipas njohësve të arsimit është i pritshëm, megjithatë këto probleme theksohet se mund të ishin evituar nga Ministria e Arsimit.
Ka pesë ditë që po kërkon libra për fëmijët e tij.
Por titujt e tyre nuk po i gjen askund në kryeqytet.
Për libra ka kërkuar edhe në libraritë e komunave tjera, por nuk i ka gjetur.
Andaj me qëllimin që t’ia siguroj sa më shpejt fëmijëve përmend edhe një opsion.
“Histori, Gjuhë Shqipe, Edukatë Qytetare, dmth qito…Pesë ditë deri qetash, në Pejë nuk gjinden, në Gjakovë nuk gjinden, në Deçan nuk gjinden, qëllova me punë këtu rastësisht u ndala, as këtu nuk gjinden, veç po shkojmë në Shqipëri i blejmë”, tha një prind.
E këto nuk janë të vetmet lëndë që po kërkohen nga prindërit.
Ndërsa mungesa e librave shkollor sipas Institutit EdGuard ka qenë e pritshme.
“Ky si proces ka qenë i pritur për shkak të koncentrimit veçanërisht më të madh në blerje në këtë fillim shtator në krahasim sikur të ish shpërndarë si proces muaj më parë”, tha Rinor Qehaja.
Për këtë njohësit e arsimit fajin ia vënë Ministrisë së Arsimit.
“Edhe kjo problem në vete për shkak se interesin e kanë shitësit ndërsa prindërit/nxënësit kanë nevojë për tekstet shkollore. Kështu që këto janë probleme shtesë për të cilat po më duket që ministria nuk ka ndërmarrë hapa për parandalim ose për zgjidhje të këtyre telasheve”, the njohësi i arsimit, Ismet Potera.
Megjithatë shpresohet që nga e hëna furnizimi i nxënësve me libra të jetë i plotë.
“Mbi 90% e nxënësve janë të furnizuar me libra, mungojnë disa tituj jo që nuk janë botu mirëpo janë shitë dhe presin nga shtëpitë botuese t’i sjellin prap. Por po besoj që nga e hëna mos të kemi telashe me furnizimin me libra dhe nxënësit t’i kenë para vetes të gjitha”, tha drejtori i shkollës “Emin Duraku” në Prishtinë, Visar Osmani.
Ky është viti i dytë me radhë që Ministria e Arsimit ka aplikuar metodën e subvencionimit të blerjes së librave përmes prindërve, për nxënësit e shkollave fillore në shumë 80 euro, ndërsa të mesme të ulëta 110 euro.
Ministrja e arsimit me 2 shtator pati deklaruar që asnjë fëmijë nuk do të mbetet pa tekste shkollore.
