Ortopedi, Osman Zhuri dhe kardiokirurgu Shpejtim Shurdhiqi kanë folur rreth Javës së Punëtorisë të Kolegjit të Kirurgëve të Kosovës e cila po mbahet këtë javë në vendin tonë.
Të ftuar në emisionin “Ditari” në Tëvë1, ata theksuan se ky Kolegj ngërthen në vete aktivitete të shumta dhe bashkëpunime me shoqata kirurgjike.
Madje ortopedi Zhuri tha se tashmë janë në përgatitje e sipër të kongresit të tretë me rradhë i cili do të mbahet me 12 tetor të këtij viti.
“Jemi duke u përgatitë për kongresin e tretë që pason me 12 tetor sivjet. Përveç kongreseve ajo që vlen të përmendet që ka një rëndësi të veçantë në Kolegjin e Kirurgëve, shtetit tonë i mungon një revistë shkencore mjekësore dhe ne është botimi i tretë i kësaj reviste që realizohet nga ana e Kolegjit të Kirurgëve dhe shpresojmë së shpejti do të bëhet indeksimi i saj. Ne si Kolegj po iu japim mundësi kolegëve tonë që janë në avancime akademike që ti botojnë punimet e tyre shkencore në këtë revistë”, tha ai.
Në anën tjetër kardiokirurgu Shpejtim Shurdhiqi tha se Java e Punëtorive të Kolegjit të Kirurgëve do të jetë një javë jashtëzakonisht frytëdhënëse dhe me bashkëpunime me klinika ndërkombëtare.
“Do të jetë një javë jashtëzakonisht frytëdhënëse e cila qon në qasje që në të ardhmen mendojmë si klinikë të vazhdojmë ta bëjmë një procedurë rutinë. Kemi kontakte me qendra të njohura ndërkombëtare të cilat na kanë dhënë përkrahje për trajnime në të ardhmen dhe bashkëpunime të përditshme që të kemi mundësi në qasjen e tyre dhe diskutimet shkencore”, tha ai./teve1.info./