E marta, ishte dita e dytë që britaniku John Duncan u ul në vendin e dëshmitarit në Dhomat e Specializuara në Hagë.
Ish këshilltari politik i Ëesley Clark, me anë të dëshmisë së tij po iu del në mbrojtje ish krerëve të Ushtrisë Çlirimtare të Kosovës .
Ai para trupit gjykues tha se në Kosovë nuk kishte ushtri të organizuar.
“Në Kosovë nuk ekzistonte një ushtri e organizuar, por pavarësisht saj, pjesa e organizuar ose pjesa e vetme në aspektin realist që qëndronte pas qeverisë së vetëshpallur, ishte krahu ushtarak, dhe ne e shpërbëmë këtë, ne përmbushëm aspiratat e tyre dhe e kuptuan që ishte në interesin e tyre të bëhej një gjë e tillë. Duke e bërë këtë në mënyrë të suksesshme ne i bindëm ata që të realizonin atë që donim ne, që ishte çarmatimi”, tha Duncan.
Sipas tij, në Kosovë kishte qeveri të vetë deklaruar.
“Ky ishte problem kryesor, dhe problem tjetër ishte që nuk ekzistonte një strukturë që mund të vinte në jetë, që mund të zbatonte udhëzimet, sepse zotëri Thaçi mund të jepte një udhëzim por nga ana tjetër nuk kishte legjitimitet demokratik, shteti që ai pretendonte të përfaqësonte nuk ekzistonte në fakt, nuk kishte shërbim publik, nuk njihej nga askush, kishte kufizim gjeografik, kaq kishte, asgjë tjetër”.
Dëshmitari u pyet edhe se kujt i raportonte Agim Çeku në atë kohë që shërbente si komandant i përgjithshëm i UÇK-së.
“Nuk e di se çfarë ka bërë ai. Por, nuk mendohet dhe supozohet që ai t’i ketë raportuar ndokujt lidhur me atë se çfarë po bënte. Kjo ishte e qartë në kushtet e marrëveshjes”.
Britaniku foli edhe për ditën e nënshkrimit të marrëveshjes dhe çka insistonte krahu i luftës.
“Kemi parë këtë shembullin insistues të palës së krahut politik që u mundua të rivendoste kontrollin ose që të rimerrte në dorë kontrollin. Kjo nuk ishte diçka e papritur. Kjo ishte diçka që pritej, Për shembull; zoti Thaçi në diskutimet gjatë takimit të 19 qershorit nuk dukej që e kuptonte ose vlerësonte plotësisht se çfarë mund të ndodhte në qoftë se ata do të nënshkruanin marrëveshjen. Krahu politik nuk do të kishte më kontroll. Ideja ishte që krahu politik do të shpërbëhej dhe për këtë arsye domethënë ishte e qarë së cili ishte qëllimi kryesor i marrëveshjes”, tha ai.
Ndërkaq, kur u pyet për një fotografi ku shihej Xhavit Haliti, ai tha se ky nuk është personi që i ishte prezantuar me këtë emër në Tiranë. Ai kërkoi që seanca të kalojë në private, për të shpjeguar diçka e cila nuk u kundërshtua nga trupi gjykues dhe palët tjera në procedurë.
