Një gjë të tillë e ka konfirmuar kryetari i Aleancës për Ardhmërinë e Kosovës, Ramush Haradinaj, pas takimit që pati të premten me Kurtin, e ku ndër të tjera tha se e kanë shqyrtuar këtë dokument nen për nen.
“Ishte një takim mundem me ju thanë me përmbajtje, për shkak që kem diskutuar e them edhe një herë përmbajtjen e një marrëveshje potenciale Kosovë – Serbi … Ne diskutim për krejt nenet e marrëveshjes, pra për të gjitha nenet, për preambulën për nenet, kemi provu me dhanë kontributin tonë si Aleancë në mënyrë që Kosova edhe në këtë proces të arrij sukses, besoj që duhet të vazhdojmë më tutje bashkë me aleatët tonë me Amerikën dhe aleatët evropian. Ajo që besoj që është e rëndësishme që në këtë proces dhe ky proces duhet ta ketë edhe vulën e Amerikës dhe jo vetëm përkrahjen e Amerikës”, tha Haradinaj.
Edhe në komunikatën për media të lëshuar nga Qeveria thuhet se u diskutua për elementet e marrëveshjes Kosovë – Serbi.
“U diskutua për procesin e dialogut, idetë, modelet dhe opsionet për elementet kryesore të marrëveshjes ndërmjet Kosovës dhe Serbisë të cilat po qarkullojnë nga e nëpër kancelaritë perëndimore e demokratike, e që në këtë periudhë funksionojnë si sprova dhe testime”, thuhet në njoftimin e Qeverisë.
Në takimin që kryeministri kishte thirrur me liderët opozitar, Haradinaj ishte i vetmi që mori pjesë, ndërsa PDK e LDK i kanë kërkuar që për temën e dialogut të diskutojnë në Kuvendin e Kosovës.
E Violeta Haxholli nga Instituti Demokratik i Kosovës, thotë se Qeveria e ka obligim kushtetues, që për çështjen e dialogut të raportojë në Kuvendin e Kosovës.
“Qeveria duhet të vazhdojë përpjekjet që të ketë një koordinim me partitë opozitare, natyrisht ne si KDI në komunikatën që dje kemi lëshuar e kemi cekur që këto takime me opozitën, takime pra liderët opozitar nuk duhet të zëvendësojnë obligimin kushtetues që ka Qeveria e Kosovës ta raportoi edhe në Kuvendin e Kosovës, në komisione dhe seanca të Kuvendit, sepse sipas Kushtetutës, Kuvendi është organi kryesor mbikëqyrës i politikës së jashtme dhe Qeveria e Kosovës e ka për obligim që t’i raportojë Kuvendit në se çfarë po ndodh në Politikën e Jashtme dhe kjo përfshinë edhe dialogun me Serbinë”, tha Haxholli.
Në takimin e fundit që Kurti kishte ftuar opozitën për të diskutuar për dialogun, përveç përfaqësuesve të AAK-së, të pranishëm ishin edhe përfaqësuesit e Lidhjes Demokratike të Kosovës.
Kronika e gazetarit Valmir Gallopeni.
