Ndërmarrja Publike “Trainkos” ka njoftuar se të martën në Stacionin Hekurudhor të Hanit të Elezit janë dëmtuar disa vagonë të sapo riparuar, të cilët siç thuhet ishin duke qëndruar në këtë stacion përkohësisht për shkak të mbylljes së linjës Hani i Elezit-Fushë Kosovë.
Në njoftim thuhet se vagonët janë rikonstruktuar përmes një investimi publik në vlerë prej 423 mijë euro, të ndara nga Ministria e Ekonomisë, dhe ende nuk janë vendosur në operim.
“Dëmtimi i tyre para përdorimit operacional paraqet një goditje të rëndë ndaj përpjekjeve për përmirësimin e transportit hekurudhor në Kosovë.Ky akt është një shembull i papërgjegjshmërisë dhe mungesës së ndërgjegjësimit qytetar për ruajtjen e pronës publike. Dëmtimi i aseteve të ndërmarrjes nuk cenon vetëm Trainkos-in si institucion, por gjithë qytetarët e Republikës së Kosovës, të cilët janë përfitues të drejtpërdrejtë të investimeve publike”, thuhet në njoftim.
Po ashtu bëhet e ditur se “Trainkos” ka informuar organet kompetente dhe është duke pritur që të ndërmerren hetimet e nevojshme dhe të merren masa ndaj personave përgjegjës.
