Nën tingujt e ilahive, u zgjuan të mërkurën qytetarët e Prishtinës.
Këta të fundit, në orët e para të mëngjesit, ia mësyn xhamive të kryeqytetit.
Me vete, ishin pajisur që nga shtëpia.
Shumë prej tyre, cak të mërkurën patën Xhaminë e Madhe në Prishtinë.
Si çdo bajram, këtu mbahet manifestimi qendror me rastin e festës së Fitër Bajramit.
E këtu, nuk munguan as ata që kësaj feste i gëzohen më së shumti.
E ata që erdhën më herët, vend zunë brenda xhamisë.
Fillimisht, u fal namazi i sabahut.
E në ora 6:41, filloi edhe falja e namazit të Bajramit.
Para xhematlinjve, në fjalim kryesor, doli myftiu i Kosovës, Naim Tërnava.
Ky tha se familja është elementi kyç për formimin e një shoqërie.
“Kushdo prej nesh që sjellë diskutimet por edhe debatet e shumta që po zhvillohen kohëve të fundit në vendin tonë për aprovimin e disa ligjeve rreth familjes, sheh që këto përpjekje bien ndesh me identitetin, fenë dhe vlerat morale që posedon shoqëria jonë. Përpjekjet në këtë drejtim janë për shkak të zhdukjen apo dobësimin e moralit të lartë që bart ky popull, ngase synohet një shoqëri që jeton pa ndjenja dhe lidhjes emocionale me familjen, të afërmit, traditën, zakonet dhe fisin”, tha Tërnava.
Tutje, myftiu i Kosovës, tha se duhet mobilizim për parandalimin e dukurive negative.
“Nga viti 2002 deri më 2023, fatkeqësisht kemi 1230 vetëvrasje në Kosovë, 151 vëllavrasje, 2933 raste humbje jetë në komunikacion. Vërtet shifra rrëqethëse , andaj kërkohet nga ne si shoqëri të mobilizohemi duke përfshirë të gjitha mekanizmat në parandalimin e këtyre dukurive ngase nëse qëndrojmë pasiv vetëvrasjet pro edhe vrasjet do të jenë fatale për ardhmërinë tonë”, tha ai.
Tërnava i bëri thirrje qytetarëve ti përgjigjen procesit të regjistrimit të popullsisë.
Në fund, besimtarët bën edhe lutjen e Bajramit.
Kur gjithçka përfundoi, filluan edhe urimet.
Ndryshe, festa e Fiter Bajramit në fenë islame, vjen pas përfundimit të muajit të madh të Ramazanit.
