“Ky është testi i vjetër ku ka qenë shembull me dy të sakta, ndërsa tek testi i ri e kemi vetëm një të saktë”.
Në këtë formë u ndryshuan pyetjet në testet për patentë-shofer në Republikën e Kosovës.
E ky sistem i ri i testimit vlen për kandidatët për patentë shofer në kategorinë B që nga 18 shkurti.
“Ky sistem synon të përmirësojë procesin e testimit dhe të sigurojë që kandidatët të kenë njohuri të përditësuara mbi rregullat e trafikut dhe sigurinë rrugore. Me publikimin e doracakut zyrtar, kandidatët kanë një burim të standardizuar për përgatitje, duke mundësuar një qasje më të strukturuar dhe të unifikuar në mësimin e materialit të nevojshëm për provimin e patentës së shoferit”, thuhet në grafikën e MMPHI-së.
E ndryshimi i këtij formati shihet pozitiv nga autoshkollat.
“Për kandidatë është shumë më e lehtë sepse ka me nxjerr vetëm një përgjigje të saktë ku është shumë më e qartë dhe më i lehtë testi se sa që ka qenë më herët si opsionale do të thotë sa i përket përgjigjeve”, ka deklaruar instruktori, Lavdim Hamiti.
Megjithatë instruktorët kanë një shqetësim.
“Sa i përket kategorisë B është shumë e mirë dhe shumë e qartë sepse ka mundësi të mësohet, vetëm që ne e kemi një brengë që nuk e kemi edhe tek kategoria A te motoçikleta, apo te kategoritë e larta siç e kemi te kategoria C apo D të tjera”, tha ai.
Sipas Ministrisë së Infrastrukturës, Doracaku u publikua në maj 2024 dhe ka qenë në dispozicion për kandidatët dhe Autoshkollat që nga ajo kohë.
