Ministria e Punëve të Brendshme synon të përcaktojë përmes një Udhëzimi Administrativ, mënyrën dhe vendosjen e pajisjeve sinjalizuese tek mjetet nën përcjellje dhe përparësi kalimi. Kjo vlerësohet si e panevojshme nga ekspertë të komunikacionit.
Për mjetet nën përcjellje dhe ato me përparësi kalimi që kanë pajisje sinjalizuese, planifikohet të bëhen disa përcaktime për mënyrën e vendosjes dhe llojet e tyre.
Këto ndryshime, Ministria e Punëve të Brendshme, synon t’i bëjë përmes një Udhëzimi Administrativ.
Mirëpo, ka kritika se një gjë e tillë nuk është e nevojshme.
“Sa i përket pjesës së borisë, sirenë apo zërit, dhe mjete që janë me alarme, ato i kanë specifikat e veta që nuk ndryshohen dhe nuk munden me ndryshu, ato janë të njëjtë sikurse kanë qenë edhe më herët. Vetëm se janë më të specifikuara se sa kanë qenë më herët”, vlerëson Lavdim Hamiti, njohës i komunikacionit.
Madje, këto ndryshime vlerësohet se duhet të jenë në përputhje me rregullat në Bashkësinë Evropiane dhe në rast ndryshime ato duhet të bëhen përmes ndryshimeve ligjore.
“Absolutikisht që s’duhet, përveç se duhet me dhënë një arsyeshmëri se për çka je tu dashtë me ndryshu edhe a kanë ndryshuar këto rregulla në Bashkësinë Evropiane, apo nuk kanë ndryshuar. Në qoftë se nuk kanë ndryshuar në Bashkësinë Evropiane, ku je duke i marrë këto rregullore që po dëshiron me i nxjerrë. Edhe këto nuk bëhen me rregullore, por me ligj”, thotë Nol Dedaj, ekspert i komunikacionit
Ky UA, aktualisht është në fazën e konsultimeve publike.
