Kosova dhe Serbia ishin paralajmëruar prej kohësh nga Bashkimi Evropian se do të përballen me masa ndëshkuese nëse nuk zbatojnë obligimet që kanë marrë në dialog.
Por, aktualisht pasojat po i vuan vetëm Kosova, kurse për Serbinë, ka vetëm paralajmërime.
Belgëzim Kamberi nga Instituti për Politika Sociale thotë se fakti që po flitet për sanksionimin e palëve, do ta dëmtojë rrjedhën e dialogut Kosovë – Serbi.
Ndërsa, njohësi i çështjeve politike, Shkëlzen Maliqi, thotë se në rast të bllokimit të dialogut, këtij procesi mund t’i gjendet ndonjë alternativë tjetër.
Propozimin e kryeministrit shqiptar Edi Rama për mbajtjen e një konference ndërkombëtare për uljen e tensioneve mes Kosovës dhe Serbisë e ka përkrahur edhe Presidenti i Këshillit Evropian, Charles Michel.
