Ish-futbollisti dhe trajneri Ardian Kozniku ka vlerësuar lart paraqitjet e kombëtares shqiptare në evropianin që po mbahet në Gjermani.
Shqipëria në dy ndeshjet e para ka nxjerrë një barazim me Kroacinë dhe ka pësuar nga Italia, teksa tash e pret përballja vendimtare ndaj liderit të grupit – Spanjës.
Kozniku thotë se përvoja e fituar ka ndikuar pozitivisht te kuqezinjtë në përballjet me skuadra më të forta.
“Edhe pse është shumë, shumë vështirë me Spanjën, këtë po e them unë para se të fillojë ndeshja. Sa i përket kualitetit në letër edhe me kualitet dhe me përvojë janë në përparësi të tri ekipet para Shqipërisë, mirëpo nuk do të thotë që sikur e kanë treguar një sukses në fushë edhe kundër Kroacisë që është fuqi në futboll, mirëpo ja treguan një lojë shumë të mirë, të pjekur dhe luajtën një lojë shumë të qetë kështu që angazhimi nuk mungoi dhe në fund u stolisën me një pikë, gjithsesi duhet të jemi të kënaqur”, tha Kozniku.
Trajneri i njohur beson se të përzgjedhurit e kombëtares shqiptare do të jenë në gjendje ta befasojnë Spanjën, duke siguruar kualifikimin historik.
“Unë mendoj se ndeshja Spanjë-Shqipëri do të jetë pothuajse e njëjtë si Kroacia me Shqipërinë për shkak se e kanë gati një stil të lojës. E kanë me shumë pasime të shkurtra, lëvizje të shpejta, edhe pse Kroacia në ndeshjen ndaj Shqipëria nuk mundi ta bëjë atë, diçka aty mungoi…Kështu që sa i përket ndeshjes Spanjë-Shqipëri unë besoj që tani Shqipëria çdoherë e më tepër njëfarë ndjenjë sigurie, luajtëm me Italinë 2-1, me Kroacinë 2-2, pse jo edhe me Spanjën dhe pse jo të mos fitojmë për shkak se aty janë 90 minuta”, vijoi më tutje Kozniku, shkruan KP.
Sipas Koznikut, meritat për kombëtaren shqiptare i atribuohen trajnerit brazilian Silvinjo, por edhe angazhimit maksimal të lojtarëve kuqezinj.
“Patjetër, unë nuk kam se çfarë të them tjetër përveçse me kualifikimin me Shqipërinë, pa marrë parasysh a kanë shtyrë lojtarët, sepse faktikisht janë lojtarët ata që e kryejnë, këtu është bashkarisht, lojtarët dhe trajneri…Patjetër që duhet ta falënderojmë trajnerin që është për ta vlerësuar për anën pozitive, sepse ka kualifikuar një ekip, një shtet për kampionat evropian, do të thotë meritat janë të trajnerit dhe lojtarëve”, ka thënë Kozniku.
Shqipëria renditet e treta në grupin B me një pikë, po aq sa edhe Kroacia në të katërtin. Në rast fitoreje ndaj Spanjës, Shqipëria mund të sigurojë fazën e radhës historike, por me kusht që Italia të humbasë ose të barazojë përballë Kroacisë.
