Mëngjesin e së premtes, minatorët e Minierës së Trepçës nuk hynë në nëntokë.
Nga e premtja e kaluar, ata ndërprenë punën e tyre brenda minierës së Stantërgut.
Kjo pasi nuk e morën të plotë pagën e muajit maj, e cila iu doli tek me 14 qershor.
Kështu ndërmarrja iu ka borxh afër 289 mijë euro këtyre punëtorëve.
“Paga që nuk po është me kohë, e kanë qitë 68% të pagës, ka qenë Bajram, nuk jonë dal me pagë me rregull, nuk po kanë njerëzit, kanë kredi nuk është paga e mjaftueshme atë pjesë që e kanë qit”, tha minatori Bajram Bala.
Bajram Bala i cili punon tash e disa vjet këtu, thotë se ka obligime familjare dhe çdo vonese do të thotë shumë për ta.
“Unë jam gjashtë anëtarë, kam tre studentë, ke festë, por çdo muaj nuk është festë na çdo muaj po kemi probleme me ta, ndikon shumë jo pak, plus kredi i kam 300 e kusur euro”, tha ai.
Nga Sindikata e Minatorëve thonë se ata ishin të detyruar të hynë në grevë.
“Një ose dy muaj të këtij viti i kemi marrë pagat me kohë kurse masanej kemi pas telashe, neve po na imponohet greva pa deshirën tonë, faji nuk është të minatorët, për minatorët është gjeja kryesor për mbijetesë”, thotë Osmani.
E pas takimeve ndërmjet menaxhmentit e minatorëve, ndërrimi i tretë iu kthye punës.
Sipas kryeshefit të ndërmarrjes “Trepça”, më së largu të premten tjetër punëtorët do të marrin pjesën tjetër të pagës.
“Nga takimi i fundit që kanë pas janë dakord që të ndërpritet greva, obligimi i ynë më së largu të premten e radhës, sot një javë, punëtorët me marrë pagat, dhe me bë maksimalen që punëtorët me marrë pagën jo me 10 por me të parin, ka shumë telashe dhe sfida”, thotë kryeshefi Bashkim Kurti.
Sipas kryeshefit, nga bojkoti i punës për 6 ditë, ndërmarrja ka humbur afër 300 mijë euro.