Për shkak se mbrojtja pretendon se nuk i ka pranuar të gjitha deklaratat e dëshmitarëve, të dhëna edhe në faza të mëhershme, është ndërprerë seanca e së enjtes në Gjykatën Themelore në Prishtinë, në rastin ku Sladan Trajkoviq po akuzohet për krime lufte.
Këto pretendime, mbrojtësi i të akuzuarit Trajkoviq, avokati Dejan Vasiq, i ka bërë para se të vazhdohej me dëgjimin e dëshmitarit Mehdi Gashi, raporton “Betimi për Drejtësi”.
Fillimisht, lidhur me një deklaratë të dëshmitarit të dhënë në Polici më 12 maj 2021, avokati Vasiq tha se e ka kërkuar edhe më herët, si dhe ka pranuar që e njëjta t’i dorëzohet edhe në gjuhën shqipe, mirëpo tha se nuk e ka pranuar ende.
Avokati Vasiq tha se ka dashur që ta lexojë atë deklaratë, para se t’i parashtrojë pyetje dëshmitarit Mehdi Gashi, duke kërkuar që të sigurohet barazia mes palëve.
Këtë deklaratë, Vasiq mohoi ta ketë pranuar edhe pse prokurorja Florije Salihu-Shamolli tha se ia kishte dorëzuar.
Në lidhje me kërkesat e avoaktit Vasiq, gjykatësi Mentor Bajraktari tha se sipas parashtresës së 17 janarit 2024, ai ka kërkuar disa deklarata të dëshmitarëve që janë dhënë para UNMIK-ut, EULEX-it, KLMDNJ-së dhe Policisë së Kosovës.
Andaj, tha se gjykata sipas detyrës zyrtare do t’iu drejtohet UNMIK-ut dhe EULEX-it lidhur me deklaratat të cilat i ka precizuar avokati në parashtresë.
