Vetëm dy ditë pas këto mjete të rënda u vendosën këtu, ato u detyruan të ndalin punimet.
Projektin mbi 18 milionë euro të Përparim Ramës për ndërtimin e sheshit “Xhorxh Bush” e ndërpreu Inspektorati për Trashëgimi Kulturore, i cili është në kuadër të Ministrisë së Kulturës.
E kjo sipas këtij institucioni u bë për një arsye.
“Institucionet përgjegjëse për Trashëgimi Kulturore, QRTK Prishtina dhe IKMM, kanë konfirmuar se Komuna e Prishtinës apo drejtoritë përkatëse: Drejtoria e Urbanizmit, Drejtoria e Planifikimit Strategjik apo Drejtoria për Transformim të Komunës së Prishtinës nuk kanë kërkuar leje për punë siç e thotë ligji i trashëgimisë kulturore, kur punohet në afërsi të aseteve të Trashëgimisë Kulturore dhe zonave mbrojtëse”, thuhet nga Inspektorati për Trashëgimi Kulturore.
Por nga Komuna e Prishtinës thonë se i kanë përfunduar të gjitha obligimet e tyre.
“Ne po konsiderojmë që një veprim i tillë nuk ka qenë mirë i menduar dhe mund të themi gati si arbitrar si vendim i Inspektoratit, as nuk ka pasur konsultime paraprake e as ndonjë takim të mirëfilltë për të vazhduar me detaje tjera nëse do të ishte e nevojshme. Ne nuk kemi shkelur asnjë rregullore e asnjë ligj pasi nuk kemi shkelur kuadrin as të dukshmërisë e as nuk kemi prekur direkt objektet që janë në mbrojtje”, ka thwnw Donat Lushaku- zëdhënës i komunës së Prishitnës.
Një zgjidhje për këtë çështje ka drejtori i organizatës “Trashëgimia Kulturore pa Kufij”, Sali Shoshi.
“Një praktikë që në masë të madhe praktikohet nga UNESCO, ICOMOS, Banka Botërore, është që të bëhet vlerësimi i ndikimit në trashëgimi. Pra është një raport i cili analizon ndërhyrjen, projektin, zhvillimet në raport me trashëgimin, me vlerat që janë për rreth si afektohen ato dhe si menaxhohet ndikimi i mundshëm negativ”, u shpreh Shoshi.
Sipas tij, ky raport mund t’u dërgohet edhe autoriteteve për trashëgimi kulturore si dhe të bëhet publik për qytetarët.
E këta të fundit po e shohin si të nevojshëm shtimin edhe të një sheshi në Prishtinë.
Kritika për projektin ka pasur edhe nga Lëvizja Vetëvendosje në Prishtinë, të cilët deklaruan se ky projekt ka probleme ligjore dhe kosto shumë të lartë.
