Ndërmarrja “Trepça Sh.A.”, thotë se pas grevës së minatorëve puna në minierë po sabotohet.
Kjo ndërmarrje thotë se “sabotimi dhe bojkotimi” i punës nuk është zgjidhje e problemeve.
Përmes postimit të disa fotografive në Facebook, “Trepça Sh.A” thotë se shihet qartë sabotimi dhe bojkotimi i punës, hyrje daljeve, si dhe sjellja e drekave dhe darkave për minatorët, ku këta të fundit i kanë quajtur “sabotues”.
“Fotot më poshtë janë vetëm disa nga ato që janë marrë nga kamerat e sigurisë të Trepça Sh.A. dhe që janë vendos për të ruajtur pronën dhe sigurinë e ndërmarrjes. Nga këto foto shihet qartë sabotimi dhe bojkotimi i punës, hyrje dalje të pakontrolluara të punëtoreve si dhe sjellja e drekave e darkave për sabotuesit”, thuhet në postim.
Tutje, është paralajmëruar se menaxhmenti i Trepçës do të ndërmerr vendime që do të bazohen në argumente dhe fakte, të cilat do të ndihmojnë që ndërmarrja të kthehet në binarët e funksionalizimit.
“Menaxhmenti i Trepça Sh.A. do të ndërmerr shumë shpejtë vendime që do të bazohen në argumente dhe fakte, të cilat do të ndihmojnë që ndërmarrja të kthehet në binarët e vet të funksionalizimit. Për Trepça Sh.A.!”, është thënë në postim.
Minatorët kanë hyrë në grevë tash e gjashtë ditë si shenjë proteste për vonesat që po u bëhen në ekzekutimin e pagave. Kërkesat e tyre janë realizimi i pagës nga data 6 deri me datën 10 të çdo muaji, dorëheqja apo shkarkimi i u.d i kryeshefit, Enis Abdurrahmani dhe kërkesa për sigurim shëndetësor dhe përmirësimin e kushteve.
Konsiderohet se për një ditë mospunë në Minierën e Trepçës, humbjet llogariten të kapin vlerën e 40-50 mijë euro./teve1.info/
