Anëtari i Kryesisë së PDK-së, Arben Mustafa, ka reaguar pas vendimit të Qeverisë së Kosovës për ndarjen e 100 eurove për studentët, duke e cilësuar këtë masë si një veprim të motivuar politikisht gjatë fushatës zgjedhore.
Në një postim në Facebook, Mustafa ka theksuar se ky veprim është një rikthim i praktikës për të “hedhur hi syve qytetarëve” dhe se studentët e Kosovës nuk mashtrohen me vendime të tilla.
“Albin Kurti, i cili të rinjve kosovarë po ua humb çdo shpresë për t’u zhvilluar e për të jetuar mirë në Kosovë, sot i është kthyer praktikës së tij për t’u hedhur hi syve qytetarëve, me nga 100 euro për studentët, në prag të zgjedhjeve. Studentët tanë kanë nevojë për një shtet që funksionon, që krijon mundësi reale për zhvillim dhe që siguron vende pune për një jetë me dinjitet. Studentët tanë nuk mashtrohen!”, ka shkruar Mustafa.
Mustafa ka shtuar se studentët kanë nevojë për politikë dhe masa që sigurojnë zhvillim të qëndrueshëm, e jo shpërblime të përkohshme që lidhen me fushatat elektorale.
Ai u ka bërë thirrje institucioneve të fokusohen në krijimin e kushteve reale për arsim, punësim dhe zhvillim profesional për të rinjtë.
