Agjencia e Ushqimit dhe Veterinarisë (AUV) ka ndaluar importin e shpezëve të gjalla dhe produkteve të tyre nga Polonia, pas konfirmimit të pranisë së sëmundjes Avian Influenza (HPAI–H5N1).
Në një njoftim zyrtar, AUV ka bërë të ditur se masa është marrë në funksion të mbrojtjes së shëndetit të kafshëve dhe sigurisë ushqimore në Republikën e Kosovës, ndërsa situata do të vazhdojë të monitorohet në vazhdimësi.
Vendimi mbetet në fuqi deri në një vlerësim të mëtejmë të rrezikut.
Megjithatë, nga ky ndalim janë përjashtuar produktet që kanë origjinë nga ferma të paprekura nga sëmundja dhe që ndodhen në një rreze prej 50 kilometrash larg zonave të prekura.
“Në funksion të mbrojtjes së shëndetit të kafshëve dhe sigurisë ushqimore në Republikën e Kosovës, AUV vendos ndalimin e menjëhershëm të importit të shpezëve të gjalla dhe produkteve të tyre nga zonat e prekura, përveç rasteve kur ato kanë origjinën nga ferma të paprekura nga sëmundja dhe që gjenden në një rreze prej 50 km larg zonave të prekura”, thuhet në njoftimin e AUV-it.
Sipas autoriteteve, sëmundja Avian Influenza është evidentuar në ferma komerciale dhe familjare, si dhe te shpezët e egra në regjionet Lubuskie, Wielkopolskie, Kodzkie dhe Podlaskie në Poloni.
AUV ka bërë të ditur se do të vazhdojë të ndërmarrë masa parandaluese dhe të informojë publikun për çdo zhvillim të ri lidhur me situatën.
