Dy persona janë ndaluar për 48 orë dhe një tjetër është në kërkim nga Policia e Kosovës, pas një bastisje që është bërë një zyrë të një subjekti ekonomik në Prishtinë.
Sipas PK-së rasti ka të bëjë me mashtrimin e një qytetari që i janë kërkuar mbi 100 mijë euro për shërimin e një anëtari të familjes në Stamboll, ndërsa që shpenzimet ishin mbuluar nga Qeveria e Kosovës
“Policia e Kosovës, Sektori për Hetime Financiare, sot më 24/04.2025, në kuadër të hetimeve për veprën penale të mashtrimit, ka realizuar një bastisje në zyrat e një subjekti ekonomik në Prishtinë, bazuar në urdhëresën e Gjykatës Themelore. Dyshimet lidhen me mashtrimin e një qytetari që i është kërkuar një shumë mbi 100,000 (njëqind mijë) euro për shërimin e një anëtari të familjes së tij në një spital në Stamboll, ndonëse shpenzimet ishin mbuluar nga Qeveria e Republikës së Kosovës”, thuhet në komunikatën e Policisë.
Bëhet e ditur se gjatë bastisjes, janë siguruar dokumente dhe pajisje si prova tjera.
“Dy të dyshuar me iniciale; (I.P.) dhe (A.B.), janë ndaluar për 48 orë, ndërsa një i dyshuar tjetër është në kërkim. Hetimet janë duke vazhduar nga autoritete për zbardhjen e plotë të rastit dhe për të siguruar drejtësi për të gjitha viktimat e mundshme”, thuhet nga policia.
