Joel Mokyr, Philippe Aghion dhe Peter Howitt fituan të hënën çmimin Nobel përkujtimor në ekonomi për hulumtimin e tyre mbi ndikimin e inovacionit në rritjen ekonomike dhe se si teknologjitë e reja zëvendësojnë ato të vjetrat, një koncept kyç ekonomik i njohur si “shkatërrim krijues”.
Fituesit përfaqësojnë qasje të kundërta, por plotësuese ndaj ekonomisë. Mokyr është një historian ekonomik i cili u thellua në trendet afatgjata duke përdorur burime historike, ndërsa Howitt dhe Aghion u mbështetën në matematikë për të shpjeguar se si funksionon shkatërrimi krijues.
Mokyr, 79 vjeç, i lindur në Holandë, është nga Universiteti Northwestern; Aghion, 69 vjeç, nga Collège de France dhe London School of Economics; dhe Howitt, 79 vjeç, i lindur në Kanada, nga Universiteti Brown.
Fituesit u vlerësuan për shpjegimin dhe përcaktimin më të mirë të “shkatërrimit krijues”, një koncept kyç në ekonomi që i referohet procesit në të cilin inovacionet e reja të dobishme zëvendësojnë – dhe kështu shkatërrojnë – teknologjitë dhe bizneset e vjetra, shkruan AP.
Koncepti zakonisht shoqërohet me ekonomistin Joseph Schumpeter, i cili e përshkroi atë në librin e tij të vitit 1942 “Kapitalizmi, Socializmi dhe Demokracia”.
Komiteti i Nobelit tha se Mokyr “demonstroi se nëse inovacionet do të pasojnë njëra-tjetrën në një proces vetëgjenerues, ne jo vetëm që duhet të dimë që diçka funksionon, por gjithashtu duhet të kemi shpjegime shkencore pse”.
