Sekretari i përgjithshëm i NATO-s, Mark Rutte, ka thënë se pret që pas zgjedhjeve në Kosovë të ketë një Qeveri stabile dhe se NATO-ja do të punojë me këdo që do të udhëheqë me vendin.
Ai procesin zgjedhor e ka vlerësuar demokratik.
“Ky ka qenë një proces demokratik. Ajo që ne kuptojmë është se i kemi rezultatet fillestare, por ende po vazhdon numërimi i votave dhe do t’i kemi edhe rezultatet finale. Dhe, bazuar në rezultatet deri tash duket se do të ketë një qeveri të koalicionit. Natyrisht, ne sigurojmë që do të punojmë me këdo që do të udhëheqë me vendin. Dhe natyrisht u dëshirojmë të gjithë politikanëve gjithë të mirat në drejtimin e hapësirës politike dhe që të sigurojnë që të ketë një qeveri stabile sa më parë që të jetë e mundur”, ka thënë Rutte, në një konferencë për media ku ka folur për takimin e ministrave të Mbrojtjes të vendeve anëtare, që zhvillohet të enjten në selinë e kësaj aleance në Bruksel.
Procesi i numërimit të votave është ende duke vazhduar, i cili ka ngjallur reagime pas probleme teknike në webfaqen e KQZ-së.
Ky institucion ka siguruar se pavarësisht problemeve integriteti i votës nuk është cenuar dhe se rezultatet janë të sakta.
Të mërkurën ka nisur rinumërimi i të gjitha kutive të votimit.
Sipas rezultateve preliminare të KQZ-së nga 99.57% e votave të numëruara, LVV është partia e parë më 40.87%, PDK 22.03%, LDK 17.61%, AAK-Nisma 7.46%
