Aleanca më e fuqishme ushtarake në botë, NATO ka thënë se zyrtarët amerikanë e kanë bërë të qartë angazhimin e tyre ndaj Aleancës për praninë në Evropës.
Në një përgjigje për Tëvë1 lidhur me raportimet e mediumit gjerman se trupat amerikane mund të largohen nga Kosova, nga NATO është thënë se SHBA ka bërë të qartë pritshmërinë që Aleatët e NATO-s të bëjnë më shumë, të investojnë më shumë dhe të prodhojnë më shumë në mbështetje të sigurisë së përbashkët.
“Zyrtarët amerikanë e kanë bërë të qartë përkushtimin ndaj Aleancës , duke përfshirë prezencën e Shteteve të Bashkuara në Evropë dhe roli parandalues dhe mbrojtës i NATO-s duhet të qëndrojë i fuqishëm. Si pjesë e kësaj, SHBA ka bërë të qartë pritshmërinë që Aleatët e NATO-s të bëjnë më shumë, të investojnë më shumë dhe të prodhojnë më shumë në mbështetje të sigurisë së përbashkët. NATO është gjithmonë në proces adaptimi për t’u përshtatur me një mjedis në ndryshim. Kjo është pjesë e asaj që kërkohet për të mbajtur gatishmërinë”, thuhet nga NATO.
Tutje thuhet se angazhimi i aleancës për stabilitet në Ballkanin Perëndimor është i palëkundur dhe se KFOR-i në Kosovë është duke zbatuar mandatin e tij sipas rezolutës së OKB-së.
“Angazhimi ynë për stabilitetin në të gjithë Ballkanin Perëndimor është i palëkundur. KFOR vazhdon të zbatojë mandatin e tij – sipas Rezolutës së Këshillit të Sigurimit të Kombeve të Bashkuara 1244 të vitit 1999 – për të kontribuar në krijimin e një ambienti të sigurt dhe të sigurt për të gjithë njerëzit dhe komunitetet që jetojnë në Kosovë dhe lëvizje të lirë, në çdo kohë dhe paanshmërisht, dhe në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë, në rolet e tyre përkatëse si përgjigjës të sigurisë. Shtetet e Bashkuara vazhdojnë të luajnë një rol themelor në KFOR, përmes kontributit të tyre afatgjatë, i cili aktualisht arrin mbi 600 ushtarë”, thuhet në përgjigjen e NATO-s.
Të martën në një deklaratë nga Misioni i Shteteve të Bashkuara të Amerikës në Aleancën Veri-Altantike u tha se “Përpjekjet e tyre vazhdojnë për të siguruar një mjedis të sigurt për të gjitha komunitetet që jetojnë në Kosovë”
Misioni amerikan në NATO: Përpjekjet për të siguruar një mjedis të sigurt vazhdojnë
