Skuadra e vendit të dytë në tabelë, Napoli, është në presion në garën për titull kampioni në Serie A pasi ka mbetur tri pikë prapa Interit. Napoli në fundjavë luan kundër Milanit.
Ndeshja Napoli – Milan luhet të dielën nga ora 20:45 në stadiumin “Diego Armando Maradona” dhe i takon xhiros së 30-të. Ekipi ku aktivizohet kapiteni i Kosovës, Amir Rrahmani, nuk e ka pasur shkëlqimin qëkur në janar u largua Khvicha Kvaratskhelia në drejtim të Paris Saint-Germainit. Napoli e ka fituar vetëm një nga shtatë ndeshjet e fundit në ligë.
Interi i ka 64 pikë, ndërsa Napoli ka 61 pikë në vendin e dytë.
Duel shumë i rëndësishëm do të jetë edhe për Milanin e trajnerit Sergio Conceicao që po ashtu është nën presion. Kampanja e Milanit po shkon drejt dështimit. “Kuqezinjtë” aktualisht zënë vendin e nëntë me 47 pikë. Janë gjashtë pikë prapa Bolognas që e zë vendin e fundit që dërgon në Ligën e Kampionëve në edicionin tjetër.
Interi mund ta forcojë vendin e parë në tabelë kur të dielën nga ora 18:00 e pret Udinesen në “Giuseppe Meazza”. Udinese është e dhjeta me 40 pikë.
Juventusi e nis periudhën me trajnerin kroat, Igor Tudor. Skuadra torineze të shtunën nga ora 18:00 e pret Genoan.
Juve e shkarkoi Thiago Mottan pas dy disfatave të thella, 3:0 nga Fiorentina dhe 4:0 nga Atalanta. Juventusi është i pesti me 52 pikë.
