Amir Rrahmani pritet të jetë i gatshëm për ndeshjen derbi të këtij vikendi që skuadra e Napolit e luan kundër Interit në kuadër të kampionatit italian.
Dueli Napoli – Inter, zhvillohet të shtunën prej orës 18:00 në stadiumin “Diego Armando Maradona” dhe i takon xhiros së tetë në Serie A.
Rrahmani është rikuperuar nga lëndimi, shkaku i të cilit i mungoi Kosovës në tri ndeshjet e fundit kualifikuese për Botërorin 2026, ndërsa Napolit i ka munguar në tetë ndeshje rresht në të gjitha garat.
Te Napoli është ndjerë mungesa e Rrahmanit në mbrojtje, duke pasur parasysh se kampioni i Italisë brenda pak ditëve pësoi 1:0 nga Torino në kampionat dhe 6:2 nga PSV Eindhoveni në Ligën e Kampionëve.
31-vjeçari është njëri prej lojtarëve më të rëndësishëm për trajnerin Antonio Conte, i cili llogarit në shërbimet e tij kundër Interit, pasi Rrahmani pritet të jetë startues në këtë përballje.
