Drejtori ekzekutiv i Partisë Demokratike të Kosovës (PDK), Naim Ismajli, ka thënë se pas zgjedhjeve përgjegjësia kryesore për ndërtimin e shumicës parlamentare i takon LVV-së, pasi që ka dalë e para nga rezultati i zgjedhjeve të 9 shkurtit.
Ai tha se ngërçi politik zgjidhet lehtë, nëse ka vullnet politik subjekti i parë.
“Obligimi kryesor i pari dhe i fundit gjithmonë pas rezultatit zgjedhor ngel te partia e parë që del në pushtet me ndërtu shumicë parlamentare. Në këtë rast, shumica parlamentare i siguron edhe konstituimin e Kuvendit edhe ndërtimin e qeverisë. Le të përpiqen le ta gjejnë një fajtor tjetër kujdestar se ta bëjmë ‘gjuajtjen e shtrigave’ mundemi gjithë kohën. Mirëpo, problemi është lehtë i zgjidhshëm – nëse ka vullnet subjekti i parë që ka dalë për nga rezultati i zgjedhjeve”, ka thënë Ismajli në emisionin “Këndi i Debatit” në Tëvë1.
Ai ka theksuar se PDK-ja është e gatshme për kompromise politike, ani pse theksoi se si subjekt politik në opozitë nuk e kanë për obligim.
“Ne kemi kompromise, nuk duhet lexuar si kushte dhe për të cilat realisht nuk kemi qenë të obliguar. Të qenit si parti opozitare ne kemi dalë në zgjedhjet e fundit me qëllim që VV-në me çu në shtëpi dhe mbi të gjitha qeverinë aktuale që është në detyrë për faktin që ka qeverisë keq me vendin. Ne realisht me mund nuk ia dhurojmë shansin e dytë qeverisë”, u shpreh ai.
Sipas tij, ngërçi politik aktual mund të zgjidhet vetëm nëse Vetëvendosje merr përgjegjësitë që i takojnë si fituese e zgjedhjeve. /teve1.info/
