Ish-kryeshefi i Korporatës Energjetike të Kosovës, Nagip Krasniqi është intervistuar sot në cilësinë e të pandehurit në Prokurorinë Speciale. Pas pesë orësh intervistim, ai doli nga Prokuroria por që nuk pranoi të flasë. Derisa avokati i tij u shpreh se Krasniqi është intervistuar për aktakuzën për keqpërdorim të pozitës zyrtare.
Në orën 13:00 u paraqit për intervistim në Prokurorinë Speciale.
Ish-kryeshefi që akuzohet për keqpërdorim të detyrës zyrtare u ftua në cilësinë e të pandehurit.
E për pesë orë ai u intervistua brenda Prokurorisë Speciale.
Pasi doli nga intervistimi i njëjti nuk u ndalë për deklarim para mediave.
Derisa prania e kamerës se tëvë1, i pengoi Krasniqit i cili kërkoi të mos xhirohej.
“A ka mundësi mos mem shqetësu, a ka mundësi? A ka mundësi mos mem shqetësu, a ka mundësi? Po nëse unë të incizoj ty qashtu është shqetësim, të lutem unë jam person privat”.
E avokati i tij, Virtyt Ibrahimaga tha se arsyeja e intervistimit ka të bëjë me aktakuzën ndaj Krasniqit për riparimin e njësisë Kosova B.
“Për keqpërdorimin e detyrës zyrtare që ka të bëjë me riparimin e Bllokut A5 që ka fillu hetimi në janar të vitit 2023. Kjo është intervista e dytë, nuk është çështje e re hetimore është e vjetër”, ka deklaruar ai.
E intervistimin e Krasniqit e konfirmoi edhe Prokuroria Speciale.
“Lidhur me rastin për të cilin keni pyetur Ju informoj se N.K. është paraqitur sot në Prokurorinë Speciale me ftesë të kësaj prokurorie. I njëjti është intervistuar në cilësinë e të pandehurit për një çështje penale, të cilën kjo prokurori e ka në hetim”, thuhet nw përgjigje.
Prokuroria Speciale ka ngritur aktakuzë më 19 gusht të këtij viti ndaj Krasniqit për veprën penale të keqpërdorimit të pozitës apo autoritetit zyrtar.
Në padi thuhet se Krasniqi i kishte mundësuar tregtimin e energjisë një kompanie sllovene në Kosovë, e cila nuk kishte licencë, duke dëmtuar kështu KEK-un në vlerë rreth 3 milionë e 230 mijë euro, gjë që i mundësoi kompanisë nga Sllovenia tregtimin e energjisë elektrike në Republikën e Kosovës.
