Ministrja në detyrë e Arsimit, Arbërie Nagavci, ka uruar nxënësit, mësuesit dhe prindërit me rastin e fillimit të vitit të ri shkollor 2025–2026, duke theksuar rëndësinë e dijes, bashkëpunimit dhe përkushtimit.
Përmes një postimi në rrjetet sociale, ajo ka vënë theksin te energjinë pozitive, mbështetja e ndërsjellë dhe forca e dijes si faktorë kyç për sukses.
“Sot nis një udhëtim i ri i dijes, i mbushur me sfida dhe mundësi të reja për të gjithë nxënësit, mësuesit dhe prindërit tanë. Ky është momenti kur fëmijët kthehen me buzëqeshje në bankat shkollore, të etur për të mësuar, për t’u rritur dhe për të realizuar ëndrrat e tyre,” ka shkruar Nagavci.
Ministrja theksoi gjithashtu rëndësinë që ka arsimi në ndërtimin e një të ardhmeje më të ndritur për vendin.
“Uroj që ta nisni këtë vit shkollor me energji pozitive, përkushtim dhe shpresë, duke besuar fort në fuqinë e dijes suaj,” shton ajo.
Nagavci përfundon mesazhin me një thirrje për bashkëpunim të ngushtë mes shkollës, prindërve dhe mësimdhënësve, duke theksuar se sukseset nuk do të mungojnë kur ka përkushtim dhe mirëkuptim.
