Ministrja e Arsimit, Arberie Nagavci, ka pritur në takim ambasadorin e Britanisë së Madhe në Kosovë, Jonathan Hargreaves.
Nagavci, ka njoftuar se në takimin me Hargreaves kanë diskutuar për çështje të rëndësishme në fushën e arsimit.
Në takim është diskutuar edhe për mbështetjen e grave dhe vajzave përmes bursave STEM e për mundësitë e financimit, si dhe për zhvillimin profesional të mësimdhënësve të anglishtes në programin e zhvillimit profesional të grupit të fundit si dhe me programin “Shkollat e Shekullit 21”, versionin online.
“Njëkohësisht, e informova në lidhje me disa nga proceset kryesore si rishikimi i teksteve shkollore, subvencionimi për tekste dhe materiale shkollore për të dytin vit me radhë, miratimin e Ligjit për edukimin në fëmijërinë e hershme”, ka shkruar Nagavci në Facebook./teve1.info/
