Ministrja e Arsimit, Arbërie Nagavci në Ditën Ndërkombëtare të Vajzave dhe Grave në Shkencë ka thënë se po punojnë fuqishëm për ngritjen e cilësisë dhe përfaqësimit të barabartë gjinor.
Nagavci tha se mbështetja e vajzave/grave dhe fuqizimi i tyre ndihmon në ngritjen akademike e profesionale të tyre.
“Mbështetja e vajzave/grave dhe fuqizimi i tyre ndihmon në ngritjen akademike e profesionale të tyre, si dhe në zhvillimin e gjithëmbarshëm social e ekonomik të Republikës së Kosovës. Sot shënohet Dita Ndërkombëtare e Vajzave dhe Grave në Shkencë. Si Ministri e Arsimit po punojmë fuqishëm për ngritjen e cilësisë dhe përfaqësimit të barabartë gjinor në arsim, shkencë, teknologji e inovacion. Po ashtu, jemi duke punuar shumë që të ngrisim pjesëmarrjen e grave dhe vajzave në këto fusha”, ka shkruar ajo në një postim në Facebook.
Ajo thotë se këtë vit do të organizojnë për herë të parë konferencën STEMininsts e cila do të mbahet në muajin prill.
“Për dy vite me radhë kemi ndarë bursa për fushat STEM. Vitin e kaluar dyfishuam buxhetin nga 1 milion në 2 milionë euro dhe po ashtu dyfishuam numrin nga 1 mijë në 2 mijë përfitues. Ndërkaq, këtë vit, për herë të parë do të organizojmë konferencën STEMininsts e cila do të mbahet në muajin prill nën patronazhin e Kryeministrit të Republikës së Kosovës në bashkëpunim me Ambasadën e Italisë në Kosovë. Kjo shënon përmbushjen e zotimit tonë të dhënë më 11 shkurt 2022 se, përtej mbështetjes financiare për vajzat/gratë në STEM, do të angazhohemi të krijojmë mundësi për rrjetëzim të grave përmes konferencës vjetore për gratë në STEM ku do të përfshijmë të gjitha nivelet e arsimit nëpërmjet Sfidës së Shkencës”, tha Nagavci.
Sipas saj, përveç tjerash, do të vazhdojnë edhe me aktivitete tjera që fuqizojnë rrjetëzimin e vajzave dhe grave. /Teve1.info/
