Latif Mustafa, studiues i filozofisë politike, ka përmendur tri mesazhet që ka dhënë Memli Krasniqi në fjalimin e tij, ku njoftoi për dorëheqjen nga posti i kryetarit të kësaj partie.
Ai ka thënë se këto mesazhe do ta fusin në qorrsokak PDK-në dhe vlerëson se në këtë parti do të ketë zhvillime interesante.
“Ai dha në mesazh simpatizantëve se ne duhet ta rrisim partinë, s’po iku sepse jam dështak edhe nuk po jam dorëheqje për shkak të humbjes. Këto ishin mesazhet nga fjalimet e tij, të cilat mendoj se do ta fusin në një qorrsokak PDK-në dhe do të ketë dinamika shumë interesante ditëve të ardhshme në këtë parti”, ka thënë ai në emisionin “Këndi i Debatit” në Tëvë1.
Memli Krasniqi tha se nuk dha dorëheqje nga partia si pasojë e lodhjes e zhgënjimit , por nga dashuria ndaj partisë.
“Ky vendim nuk është i momentit e as i zhvillimeve të fundit. Është reflektim mbi atë se çka i duhet PDK-së në fazën e ardhshme. Nuk është vendim prej lodhjes apo zhgënjimit – por prej dashurisë për partinë time. E bëj këtë me paqe në shpirt dhe me dashuri në zemër. Dashuri për PDK-në. Dashuri për Kosovën”, u shpreh ai.
