I ftuar në emisionin “Info Nata”, Mustafa foli për rritjen e çmimeve me të cilat po ballafaqohen qytetarët.
Ai me këtë rast theksoi se Qeveria duhet t’i korrigjojë kompensimet por jo përmes ndihmave të njëhershme.
“Me këtë rritje të çmimeve me të cilat po ballafaqohen qytetarët dhe me këtë rritje të të hyrave që Qeveria po e regjistron kryesisht si rezultat i rritjes së çmimeve ka hapësirë për rritje të pagave dhe duhet të rriten. Ka mundësi për rritje të pagave, Qeveria e ka një bilanc buxhetor të cilin nuk e ka pasur kurrë më të lartë sesa tash gjatë kësaj periudhe të vitit dhe Qeveria duhet t’i korrigjoj të paktën për inflacion kompensimet si për njerëzit në sektorin publik ashtu edhe pensionistët dhe përfituesve të ndihmave sociale por jo përmes ndihmave të njëhershme por ata duhet të përshtaten me rritjen e kostos së jetesës”, tha ai.
Mustafa tutje tha se Qeveria duhet ta kthejë në agjendën e saj zhvillimin ekonomik.
“Qeveria duhet ta kthejë në agjendën e saj zhvillimin ekonomik prej të cilit duhet se po abstrahon për një kohë të gjatë, pra në diskursin e Qeverisë askund nuk e shohim zhvillimin e ekonomik si politikë. Masat e tilla janë thjeshtë një rishpërndarje e parave të cilat merren nga ata që paguajnë taksa dhe të njëjtat para rishpërndahen te disa kategori shoqërore”,tha ai./Teve1.info/